এগৰাকী জনপ্ৰিয় অভিনেতাৰ লগতে সমৰকলাৰ ক্ষেত্ৰতো বিশেষ খ্যাতি অৰ্জন কৰিবলৈ সক্ষম হোৱা একচন পৰিচালক প্ৰধান দেউৰীৰে আমাৰ আছুতীয়া সাক্ষাৎকাৰত শৰীৰ চৰ্চা সম্পৰ্কত কয় যে তেওঁ ৰাতিপুৱা শুই উঠি ২/৩ গিলাচ পানী খায়। ইয়াৰ পাছত এল’ভেৰা আৰু আমলখিৰ চৰ্বত খাই আৰু তেনেধৰণে আৰম্ভ কৰে দৈনিক সুস্থ খাদ্যসূচী।
“…অভিনয়ৰ ওপৰত দক্ষতা থকাৰ লগতে শৰীৰ চৰ্চাও বৰ দৰকাৰী কাৰণ সুস্থ শৰীৰত হে সুস্থ মনে বাহ লয়। যিহেতু শিল্পী হ’বলৈ সুন্দৰ মন এটাৰ প্ৰয়োজন…”
প্ৰধান দেউৰীয়ে তিনি ধৰণৰ ব্যায়াম কৰে যথা প্ৰাণায়ম, সমৰকলা আৰু জিম। প্ৰাণায়ম কৰিলে ধৈয্য বৃদ্ধি হোৱাৰ ওপৰিও বিভিন্ন বেমাৰ প্ৰতিৰোধ হয়। অৱশ্যে সমৰকলা আৰু প্ৰাণায়ম কৰিলে মাচুল(পেশী) বৃদ্ধি নহয়। গতিকে আকৰ্ষণীয় মাচুলৰ বাবে তেওঁ জিমলৈ যায়। তেওঁ সপ্তাহত ৫ দিন জিমলৈ যায়।
অৱশ্যে বহুতে জিম কৰি প্ৰাণায়ম নকৰাৰ প্ৰসংগত তেওঁ কয় যে জিম কৰাৰ আগতে প্ৰাণায়ম কৰাটো বৰ জৰুৰী। সেইবাবে তেওঁ জিম কৰাৰ আগতে প্ৰাণায়ম কৰে। সমৰকলাৰ চৰ্চা কৰে কামৰ ওপৰত নিৰ্ভৰ কৰি। উল্লেখযোগ্য যে প্ৰতিবৰ্ষৰ দৰে এই বৰ্ষতো প্ৰধান দেউৰী ব্যস্ত আছে কেইবাখনো ভ্ৰাম্যমাণৰ সমৰকলা তথা একচনৰ পৰিচালক হিচাপে।
অভিনয় জগতত কাম কৰিবলৈ হেঁপাহ কৰা নতুন যুৱক-যুৱতীসকলক তেওঁ কয় যে ইয়াৰ বাবে অভিনয়ৰ ওপৰত দক্ষতা থকাৰ লগতে শৰীৰ চৰ্চাও বৰ দৰকাৰী কাৰণ সুস্থ শৰীৰত হে সুস্থ মনে বাহ লয়। যিহেতু শিল্পী হ’বলৈ সুন্দৰ মন এটাৰ প্ৰয়োজন, গতিকে দৈনিক শৰীৰ চৰ্চাই তেওঁলোকক সুন্দৰ হোৱাত সহায় কৰাৰ লগতে সফল অভিনেতা হোৱাটো যথেষ্ট সহায় কৰিব।
তদুপৰি প্ৰধান দেউৰীয়ে কয়, ‘সাধাৰণ লোকেও নিজকে সুস্থ আৰু বহু দিনলৈ সুন্দৰকৈ ৰাখিবলৈ কিছু সময়ৰ বাবে হ’লেও শৰীৰ চৰ্চা কৰাটো জৰুৰী। শৰীৰ চৰ্চাৰ ফলত ব্যক্তিৰ দেহৰ পৰা এক হৰমন নিঃসৰিত হয় যি হৰমনে ব্যক্তিক দিনটোলৈ কাম কৰাৰ বাবে আনন্দ দিয়ে।’ লগতে কয় যে অভিনয় কৰা সময় বোৰৰ বাহিৰে তেওঁ আন সময়ত মেক-আপ নকৰে। তেওঁৰ মতে মানুহৰ মনটো সুন্দৰ হ’লে প্ৰসাধন নকৰাকৈও ব্যক্তিক ধুনীয়া দেখা যায়।
(পৰৱৰ্তী আলোচনাতঃ শিশুৰ বাবে ব্যায়ামৰ প্ৰয়োজনীয়তা কিমান?)
