ASSAM TIMES POST
বিশ্ব খ্যাত উছাইন ব’ল্টৰ নাম নজনা ক্ৰীড়াপ্ৰেমী নাই৷ ব’ল্টৰ আন্তৰ্জাতিক চাৰ্কিটত ১০০ মিটাৰত অভিলেখ হ’ল ৯.৫৮ ছেকেণ্ড৷ কিন্তু ভাৰতৰ এক ক্ৰীড়া প্ৰতিভাই বৰ্তমান দেশবাসীৰ মন জিনিবলৈ সক্ষম হৈছে৷
খালি ভৰিৰে পকা ৰাস্তাত ১০০ মিটাৰত ভাৰতৰ এই ক্ৰীড়া প্ৰতিভাই সময় লৈছে ১১ ছেকেণ্ড৷ ২৪ বছৰীয়া ভাৰতীয় এই এথলেটিকজন হ’ল মধ্যপ্ৰদেশৰ ৰামেশ্বৰ সিং৷
এইজন ভাৰতীয় এথলেটিকৰ প্ৰতিভাত বৰ্তমান দেশবাসী প্ৰশংসাত পঞ্চমুখ হৈ পৰিছে৷ ইতিমধ্যে ৰামেশ্বৰৰ এটা ভিডিঅ’ সমগ্ৰ দেশতে ভাইৰেল হৈ পৰিছে৷
দৰিদ্ৰ পৰিয়ালৰ এই যুৱকজন দশম শ্ৰেণীলৈকে অধ্যয়ন কৰে৷ ৰামেশ্বৰৰ দ্ৰুত গতিত দৌৰ দেখি আশ্চৰ্য প্ৰকাশ কৰিছে ভাৰতৰ ক্ৰীড়ামহল৷
ইতিমধ্যে ৰামেশ্বৰৰ দৌৰ দেখি আচৰিত হৈছে মধ্যপ্ৰদেশৰ প্ৰাক্তন মুখ্যমন্ত্ৰী শিৱৰাজ সিং চৌহান৷
প্ৰাক্তন মুখ্যমন্ত্ৰীজনে কেন্দ্ৰীয় ক্ৰীড়া মন্ত্ৰী কিৰেণ ৰিজিজুক ৰামেশ্বৰৰ সন্দৰ্ভত অৱগত কৰিছে৷
ভিডিঅ’ চাই বহু লোকে উল্লেখ কৰিছে যে প্ৰশিক্ষণ পালে ৰামেশ্বৰে এদিন ১০০ মিটাৰত ৯ ছেকেণ্ডৰ অভিলেখ স্পৰ্শ কৰিব৷
ইতিমধ্যে ৰামেশ্বৰক কেন্দ্ৰীয় ক্ৰীড়া মন্ত্ৰী ৰিজিজুৱে ভূপালৰ ছাইত প্ৰশিক্ষণৰ সুবিধা কৰি দিছে৷
