ASSAM TIMES POST
নতুন দিল্লীঃ আইএনএক্স মিডিয়া গোচৰত গ্ৰেপ্তাৰৰ ভয়ত মঙলবাৰৰপৰা নিৰুদ্দেশ হৈ থকা জ্যেষ্ঠ কংগ্ৰেছ নেতা আৰু প্ৰাক্তন বিত্তমন্ত্ৰী পি চিদাম্বৰমৰ জৰুৰী জামিন আবেদন বুধবাৰে নাকচ কৰে দেশৰ মুখ্য ন্যায়াধীশ ৰঞ্জন গগৈয়ে।
ইয়াৰ পৰিপ্ৰেক্ষিততে তেওঁ আত্মসমৰ্পণ কৰাৰ বাহিৰে কোনো বিকল্প নাই। কিয়নো মঙলবাৰে দিল্লী উচ্চ ন্যায়ালয়েও চিদাম্বৰমৰ অন্তৰ্বতীকালীন জামিন আবেদন অগ্ৰাহ্য কৰিছিল। ইয়াৰ পৰিপ্ৰেক্ষিততে চিদাম্বৰম অন্তৰ্ধান হৈ সৰ্বোচ্চ ন্যায়ালয়লৈ অপেক্ষা কৰিছিল।
কিন্তু বুধবাৰে উচ্চতম ন্যায়ালয়েও সকাহ নিদিয়াত চিদাম্বৰমৰ মুক্তিৰ কোনো পথ নোহোৱা হৈ পৰিল। মন কৰিবলগীয়া যে মঙলবাৰৰ নিশাৰপৰা বুধবাৰৰ পুৱালৈকে দিল্লীৰ জোৰ বাঘস্থিত বাসগৃহৰ সন্মুখত উপস্থিত আছিল চিবিআই আৰু ইডিৰ দুটা পৃথক গোট।
তদুপৰি মঙলবাৰে নিশাই চিবিআয়ে চিদাম্বৰমক দুঘন্টাৰ ভিতৰত তেওঁলোকৰ সন্মুখত ধৰা দিবলৈ বাসগৃহৰ দেৱালত এখন জাননী আঁৰি দিছিল।
