ASSAM TIMES POST
বোকাজানঃ ক্ৰমবৰ্ধমান হত্যা-হিংসাৰ ঘটনাই ৰাজ্যখনক অশান্ত কৰি ৰখাৰ সময়তে বোকাজানৰ বালিপথাৰ শ্যাম গাঁৱত এক লোমহৰ্ষক হত্যাকাণ্ড সংঘটিত হৈছে৷ গাওঁখনৰ বুলু ভূমিজ নামৰ লোকজনে লাঠিৰে মৰিয়াই মৰিয়াই পত্নী হেমন্তী ভূমিজক হত্যা কৰে৷
ঘটনাৰ বিৱৰণী অনুসৰি দেওবাৰে ৰাতি বুলু ভূমিজ আৰু তেওঁৰ পত্নীৰ মাজত কাজিয়া লাগিছিল৷ এই কথা গম পোৱা সত্বেও কাষতে বেলেগে থকা ভ্ৰাতৃ আৰু তেওঁলোকৰ পৰিয়ালৰ কোনো লোক কাজিয়া ভাঙিবলৈ যোৱা নাছিল৷ কাৰণ প্ৰায়েই সুৰামত্ত হৈ ৰাতি বুলু ভূমিজে পত্নীৰ লগত কাজিয়া কৰে। সেয়ে পূৰ্বৰ দৰেই সাধাৰণ কথা বুলি ভাবে তেওঁলোকে।
কিন্তু সোমবাৰে বহু সময়লৈকে নবৌৱেক বাহিৰলৈ ওলাই নহা দেখি ভায়েকৰ পৰিবাৰে খবৰ ল’বলৈ যোৱাত হেমন্তী ভূমিজক বিছনাত ৰক্তাক্ত দেহাৰে পৰি থকা প্ৰত্যক্ষ কৰি তেওঁৰ স্বামীৰ লগতে অন্যান্য লোকক অৱগত কৰে৷ পিছত আৰক্ষীক অৱগত কৰাত মৃত অৱস্থাত হেমন্তী ভূমিজক উদ্ধাৰ কৰাৰ লগতে অভিযান চলাই হত্যাকাৰী বুলু ভূমিজকো আটক কৰিবলৈ সক্ষম হয়।
মন কৰিবলগীয়া যে হত্যাকাৰী বুলু ভূমিজে পূৰ্বে দুবাৰকৈ বিবাহ পাশত আৱদ্ধ হৈছিল আৰু সেই দুয়োগৰাকী পত্নীকে ধাৰাবাহিকভাৱে শাৰীৰিক অত্যাচাৰ কৰাত মাকৰ ঘৰখনলৈকে উলটি গৈছিল৷ ইতিমধ্যে বোকাজান আৰক্ষীয়ে হত্যাকাৰী বুলু ভূমিজক জেললৈ প্ৰেৰণ কৰিছে৷
