অসমত প্ৰতিভাৰ যেন অভাৱ নাই : পুৰণি মটৰ চাইকেলৰ ইঞ্জিনেৰে পাৱাৰ বিটা নিৰ্মাণ

লংকাৰ পৰা মনোজ কুমাৰ পাঠক

মনত একাগ্ৰতা আৰু কাম কৰাৰ স্পৃহা থাকিলে যিকোনো কামতেই যেন সফল হ’ব পাৰি সেই কথা প্ৰমাণ কৰি দেখুৱালে লংকাৰ এজন উদীয়মান যুৱকে। নিজ‌ উদ্ভাৱনী শক্তিৰ পৰিচয়ৰে লংকাৰ জাৰণি গাঁৱৰ যুৱক ছাইফুল ইছলাম লস্কৰে সাজি উলিয়াইছে পাৱাৰ টিলা সদৄশ এইখন বিশেষ পাৱাৰ বিটা। পেছাত এগৰাকী মেকানিক ছাইফুল ইছলাম লস্কৰে সৃজনীশীল মনৰ পৰিচয় দি এখন পুৰণি মটৰ চাইকেলৰ ইঞ্জিন ব্যৱহাৰ কৰি সুন্দৰ আৰ্হিৰে নিৰ্মাণ কৰি উলিয়াইছে পাৱাৰ বিটাখন

উল্লেখ্য যে, ৩০ হাজাৰ টকা খৰচ কৰি ১৫ দিনৰ মূৰত পাৱাৰ বিট খন নিৰ্মাণ কৰিবলৈ সক্ষম হোৱা ছাইফুল ইছলাম লস্কৰে ইতিমধ্যে নিয়োজিত হৈ পৰিছে কৃষি কাৰ্যত। যুৱকজন সাজি উলিওৱা এই বিশেষ পাৱাৰ বিটখনৰে ১ বিঘা মাটি চহাবলৈ প্ৰয়োজন হ’ব ১ লিটাৰ ইন্ধনৰ।যিটো সময়ত দৰিদ্ৰ কৃষক ৰাইজে পাৱাৰ টিলা নাইবা ট্ৰেক্টৰৰে কৃষি কৰ্ম কৰিবলৈ অধিক ধন ব্যয় কৰিব লাগে ঠিক তেনেসময়তে প্ৰতিভাৱান যুৱকজনে উদ্ভাৱনী শক্তিৰে সাজি উলিওৱা এই পাৱাৰ বিটখনে দৰিদ্ৰ কৃষক ৰাইজক কম খৰচতে কৃষি কৰ্ম কৰাত সহায় কৰিব বুলি আশা ব্যক্ত কৰে যুৱকজনে।