অজন্তা তালুকদাৰ
বোকাখাত : অসমৰ ভিতৰতে প্ৰথম ক’ভিড-১৯ ভেকচিন লোৱা ব্যক্তি ৰূপে পৰিগণিত হ’ল বোকাখাতৰ ডাঃ মিলন কুমাৰ লস্কৰ ৷ যোৱাটো বৰ্ষত সমগ্ৰ বিশ্বৰ লগতে আমাৰ দেশ তথা ৰাজ্যখনত ক’ভিড-১৯ৰ বিৰুদ্ধে সমুখৰ পৰা সমৰত লিপ্তহোৱা চিকিৎসা সেৱাৰ যোদ্ধা হিচাপে নিজৰ দায়িত্ব আৰু কৰ্তব্য পালন কৰি বিশ্ব মানসত এক চানেকি দাঙিধৰি চিকিৎসকসকল হৈ পৰিছিল হিৰ’। তেনে এগৰাকী চিকিৎসক বোকাখাতৰ ছহিদ কমলা মিৰি অসামৰিক চিকিৎসালয়ৰ ডাঃ মিলন কুমাৰ লস্কৰে আজি পুৱা ১০-৪৫ বজাত মহকুমাধিপতি বিপুল দাসে শুভাৰম্ভ কৰাৰ পাছতেই ক’ভিডৰ ভেকচিন গ্ৰহণ কৰে ৷
ছহীদ কমলা মিৰি অসামৰিক চিকিৎসালয়ৰ এ,এন,এম, ৰীতা ভূঞাই বোকাখাতৰ মহকুমাধিপতি বিপুল দাস, বোকাখাত মহকুমাৰ ছহীদ কমলা মিৰি অসামৰিক হস্পিতালৰ অধীক্ষক ডাঃ অপূৰ্ব কুমাৰ শৰ্মা,মহকুমা স্বাস্থ্য বিষয়া ডাঃ ভাৰত ফুকনৰ উপস্থিতিত ডাঃ লস্কৰক ভেকচিনৰ প্ৰথমটো ড’জ দিয়ে ৷
ইয়াৰ পাছতে ডাঃ লস্কৰক মহকুমা প্ৰশাসনৰ পৰা এখন গামোছাৰে আদৰণী জনাই ৷ ডাঃ মিলন কুমাৰ লস্কৰে ভেকচিন লোৱাৰ পাছত পৰ্যায়ক্ৰমে সকলোকে কোনো সংকোচ নকৰাকৈ ভেকচিন লোৱাৰ আহ্বান জনায় আৰু ভেকচিনে কাৰো কোনো অপকাৰ নকৰিব বুলি আশা প্ৰকাশ কৰে৷ ডাঃ মিলন কুমাৰ লস্কৰক স্বাস্থ্যমন্ত্ৰী ডঃ হিমন্ত বিশ্ব শৰ্মাইয়ো শুভেচ্ছা জনাইছে ৷ বোকাখাতৰ ছহীদ কমলা মিৰি হস্পিতালৰ উপৰিও গোলাঘাট জিলাৰ নুমলীগড় তেলশোধনাগাৰৰ বিবেকানন্দ কেন্দ্ৰ হস্পিতাল, গোলাঘাটৰ ছহীদ কুশল কোঁৱৰ হস্পিতালতো ক’ভিড ভেকচিন দিছে ৷ প্ৰতিখন চিকিৎসা প্ৰতিষ্ঠানতে ১০০জনকৈ মুঠ ৩০০ জনক ভেকচিন দিয়াৰ পৰিকল্পনা কৰিছে ৷
বোকাখাত মহকুমাত ক’ভিড-১৯ত আক্ৰান্ত হৈ ৩০ জন লোকৰ মৃত্যু হোৱাৰ লগতে ৩০৬৯ জন লোক আক্ৰান্ত হৈছিল ৷ প্ৰথম পৰ্যায়ত আজি ১১টা বাকছত ভেকচিন আনিছে ৷ প্ৰথম পৰ্যায়ত আশা কৰ্মী আৰু স্বাস্থ্য বিভাগৰ লগত জড়িত লোকক প্ৰদান কৰিব ক’ভিড ভেকচিন ৷ বোকাখাতত কভিস্কিল ভেকচিন প্ৰদান কৰিছে৷
