ছাইদুল ইছলাম
ডিফু : উত্তৰ-পূৰ্বাঞ্চলৰ অন্যতম কাৰবি যুৱ মহোৎসৱ থলী তাৰালাংছত জনগোষ্ঠীয় কৃষ্টি-সংস্কৃতি আৰু সমন্বয়ৰ অপূৰ্ব সমন্বয় ঘটিছে ৷ সৰু- বৰ পাহাৰৰ নৈসৰ্গিক আৰু নান্দনিক পৰিবেশৰ মাজত তাৰালাংচ’ৰ বৃহৎ সাংস্কৃতিক প্ৰকল্পত তৃতীয় দিনাও উখল-মাখল পৰিবেশ ৷ ৮২৭ বিঘা ভুমিৰ বৃহৎ প্ৰকল্পটোত যোৱা ১৫ ফেব্ৰুৱাৰীৰ পৰা ২৯ ফেব্ৰুৱাৰীলৈ চাৰিদিনীয়া কাৰ্যসূচীলৈ এক মেলামুখী আৰু উৎসৱ মুখৰ পৰিবেশে বিৰাজ কৰি আছে ৷
কাৰবি আংলঙ আৰু ডিমা হাছাওৰ বাহিৰেও অসমৰ বিভিন্ন প্ৰান্তৰ প্ৰায় ৫ সহস্ৰাধিক শিল্পীয়ে তাৰালাংচৰ বাকৰিত পৰাম্পৰাগত নৃত্য, গীত আৰু বিভিন্ন প্ৰতিযোগিতাৰে মুখৰিত কৰি ৰাখিছে ৷ কাৰবি যুৱ মহোৎসৱৰ বাবে তাৰালাংচ’ৰ বৃহৎ প্ৰকল্পত থকা স্থায়ী আচেথাই (মুকলি মঞ্চ) সমুহত জনজাতীয় যুৱ শিল্পীসকলে নিজৰ নিজৰ শিল্প শৈলী প্ৰদৰ্শন কৰি আহিছে ৷ আজি কাৰ্যক্ৰমণিকা অনুসৰি জনজাতীয় ক্ৰীডা ‘হামবি কেপাথু’ ঘিলা গুটি খেলৰ লগতে জনগোষ্ঠীয় নৃত্য গীত, কুইজ প্ৰতিযোগিতা, হেমফু মক্ৰাং খেলপথাৰত কেংডংডাং খেল, জনজাতীয় বজাৰত বোৱা-কটা প্ৰতিযোগিতা, বাঁ আৰু কাঠ শিল্পৰ প্ৰতিযোগিতা, ৰিতনং চিংদি নৃত্যৰ লগতে আধুনিক গীত প্ৰতিযোগিতা অনুষ্ঠিত হৈ যায় ৷
ইয়াৰোপৰি সন্ধিয়াৰ ভাগত জয়ছিং ৰংৰি আৰু জয়ৰাম তিচ’ সাংসেকৃতিক সন্ধিয়া আৰু ছেমছনছিং ইংতি মঞ্চত সন্মিলিত কাৰবি যুৱ সন্থাৰ উদ্যোগত মিষ্টাৰ কেৱাইএফ-২০২১ প্ৰতিযোগিতা অনুষ্ঠিত হয় ৷ ঐতিহ্যময় কাৰবি পৰাম্পৰাগত লোক-কৃষ্টি সংস্কৃতিৰ উন্নয়ণ, বিকাশ আৰু সংবৰ্দ্ধনৰ বাবে কাৰবি পিপুলছ হলছ তাৰালাংক প্ৰতিবছৰে আধুনিকৰ পৰা আধুনিকতম ৰূপ দিয়াৰ প্ৰয়াস কৰি থকা হৈছে বুলি কয় ৷ তাৰালাংচলৈ প্ৰৱেশ কৰা বাট-পথসমূহ কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্যই পূৰ্বৰ প্ৰতিশ্ৰুতি অনুসৰি ৪ লেন যুক্ত পথ, সৌৰচাকি ষ্ট্ৰীট লাইটেৰে ন-ৰূপ প্ৰদান কৰিছে৷
