ষ্টাফ ৰিপ’ৰ্টাৰ
ডিফু : বি টি আৰৰ আৰ্হিত কার্বি আংলং আৰু ডিমা হাচাও জিলাৰ অন্তর্গত প্রাদেশীকিকৰণ প্রক্রিয়াৰ অন্তর্ভুক্ত নোহোৱা সকলো বিদ্যালয়কে প্রাদেশীকিকৰণৰ ব্যৱস্থা লোৱা হ’ব। এই সন্দর্ভত অসম চৰকাৰৰ শিক্ষা দপ্তবৰ মন্ত্রী ডঃ হিমন্ত বিশ্ব শর্মাৰ সৈতে আলোচনা চলাই থকা হৈছে।- এই মন্তব্য কার্বি আংলং স্বায়ত্তশাসিত পৰিষদৰ মুখ্য কার্যবাহী সদস্য তুলিৰাম ৰংহাঙৰ।
উল্লেখযোগ্য যে, অলপতে প্রাদেশীকিকৰণ হোৱা কার্বি আংলং আৰু পশ্চিম কাৰ্বি আংলঙৰ বিদ্যালয়সমূহত টিউটৰ হিচাপে নিযুক্তি লাভ কৰা শিক্ষকসকলক আজি নিযুক্তি-পত্র বিতৰণ কৰা হয়। নিযুক্ত-পত্র বিতৰণ অনুষ্ঠানত উপস্থিত থাকি প্রদান কৰা ভাষণত পৰিষদৰ মুখ্য কার্যবাহীগৰাকীয়ে পাহাৰীয়া জিলাখনৰ সকলো বিদ্যালয়কে প্রাদেশীকিকৰণ কৰাৰ কথা ঘোষণা কৰাৰ লগতে এইক্ষেত্রত অসম চৰকাৰৰ শিক্ষামন্ত্রী ডঃ হিমন্ত বিশ্ব শর্মায়ে সহমত প্রকাশ কৰা বুলি কয়।
সেই অনুসৰি, নির্বাচনৰ আগে-পিছে ভেঞ্চাৰ বিদ্যালয়ৰ সমস্যাৰ সমাধান হ’ব বুলি মুখ্য কার্যবাহীগৰাকীয়ে আশা প্রকাশ কৰে ৷ ঠিক সেইদৰে টেট উত্তীর্ণ ঠিকাভিত্তিক শিক্ষকসকলৰ পদসমূহ পর্যায়ক্রমে নিয়মীয়াকৰণ কৰাৰ লগতে এই মাহৰ ভিতৰতে টেট উত্তীর্ণ পাঁচ শতাধিক প্রার্থীক নিযুক্তি প্রদান কৰা হব বুলি ঘোষণা কৰে।
উল্লেখযোগ্য যে, শেহতীয়াকৈ কার্বি আংলং স্বায়ত্তশাসিত পৰিষদ এলেকাৰ অধীনত ২৯খন এম ই আৰু ১১ খন এল পি স্কুলৰ প্রাদেশীকিকৰণ কৰা হৈছে। ইয়াৰে ২৯খন এম ই স্কুলৰ বিপৰীতে ৭১ গৰাকী শিক্ষকে টিউটৰ হিচাপে নিযুক্তি-পত্র লাভ কৰাৰ বিপৰীতে এঘাৰখন এল পি স্কুলৰ ১৭ গৰাকী শিক্ষকে টিউটৰ হিচাপে নিযুক্তি লাভ কৰিছে। নিযুক্তি-পত্র বিতৰণ সভাত উপস্থিত থাকি প্রদান কৰা ভাষণত মুখ্য
কার্যবাহীগবাকীয়ে বিনা বেতনে দীর্ঘকাল ধৰি ছাত্র-ছাত্রীক শিক্ষাদান কৰি সমাজৰ প্রতি গুৰুত্বপূর্ণ অৱদান আগবঢ়াই অহাৰ বাবে শিক্ষকসকলক ধন্যবাদ জনায়। সাংসদ হৰেণছিং বেয়ো সভাখনত উপস্থিত থাকে। কার্বি আংলং স্বায়ত্বশাসিত পৰিষদৰ সচিবালয়ত অনুষ্ঠিত হোৱা নিযুক্তি-পত্র বিতৰণ অনুষ্ঠানত পবিষদৰ কেইবাগৰাকী কার্যবাহী সদস্য, পৰিষদীয় সদস্য আদি উপস্থিত থাকে।