নগাঁও : নগাঁৱৰ পুৰণিগুদাম গোসাঁইগাঁৱৰ নৰসিংহ ক্ষেত্ৰত চলি থকা মহামৃত্যুঞ্জয় মন্দিৰৰ স্থিৰ প্ৰাণ প্ৰতিষ্ঠা মহোৎসৱ আৰু ১০৮ কুণ্ডৰ মহামৃত্যুঞ্জয় যজ্ঞৰ আজি একাদশ দিনটোত ৬খনকৈ গ্ৰন্থ উন্মোচন কৰা হয়। বাবা ভৃগুগিৰি মহাৰাজ ভাষা ভাষ্য সহিত অথৰ্ৱবেদৰ দ্বিতীয় খণ্ড, সামবেদৰ দ্বিতীয় আৰু তৃতীয় খণ্ডৰ উপৰি প্ৰবীণ গোস্বামী ৰচিত ‘নৰসিংহ ক্ষেত্ৰ আৰু মোৰ অনুভূতি’, বাবা ভৃগুগিৰিৰ ‘চাপানলা’ নামৰ গ্ৰন্থখনৰ সাংবাদিক অজয় মাহাতোৱে কৰা হিন্দী অনুবাদ আৰু স্হিৰ প্ৰাণ প্ৰতিষ্ঠা মহোৎসৱৰ স্মৃতিগ্ৰন্থ ‘যজ্ঞামৃত’ উন্মোচন কৰে ক্ৰমে গুৱাহাটী বিশ্ববিদ্যালয়ৰ সংস্কৃত বিভাগৰ অৱসৰপ্ৰাপ্ত অধ্যাপিকা ড: নলিনী দেৱী মিশ্র, অসম চৰকাৰৰ শিক্ষা বিভাগৰ অৱসৰপ্ৰাপ্ত সঞ্চালক সতীশ চন্দ্ৰ শৰ্মা, পণ্ডিত কনক শৰ্মা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ লক্ষ্মী নাৰায়ণ শৰ্মা আৰু বিশিষ্ট সমাজসেৱী ৰেখা শৰ্মাই । ভৃগুগিৰি ভাষা ভাষ্য সহিত অথৰ্ৱবেদৰ দ্বিতীয় খণ্ড, সামবেদৰ দ্বিতীয় আৰু তৃতীয় খণ্ড উন্মোচন কৰি অৱসৰপ্ৰাপ্ত অধ্যাপিকা ড: নলিনী দেৱী মিশ্রই কয় যে বেদক সনাতন হিন্দু ধৰ্মৰ মূল গ্ৰন্থ বুলি কোৱা হয়। বেদৰ জ্ঞান ৰাশি কোনো নির্দিষ্ট মানুহৰ সৃষ্টি নহয়। ই অনুভূতিৰ আৰু সাধনাৰ বস্তু। বেদৰ জ্ঞান অৱধাৰিতভাৱে মনীষীসকল ধাৰন কৰি আহিছে।
আনহাতে, বেদৰ বচন বিলাকক আক্ষৰিক ছন্দত অহা বুলি উল্লেখ কৰি ড: মিশ্রই লগতে কয় যে বেদৰ বাক্য আমি সালসলনি কৰিব নোৱাৰো। বেদৰ বাক্য পৰিৱর্তন কৰিলে অৰ্থ নোলায়।
আনহাতে, প্ৰসংগক্ৰমে তেওঁ বৰ্তমানেও আমাৰ সমাজত মহিলাৰ সামাজিক মৰ্যাদা যিমানখিনি হ’ব লাগিছিল সিমানখিনি হোৱা নাই বুলিও মন্তব্য কৰে ।
ইপিনে প্ৰবীণ গোস্বামীয়ে ৰচনা কৰা ‘নৰসিংহ ক্ষেত্ৰ আৰু মোৰ অনুভূতি’ শীৰ্ষক গ্ৰন্থখন উন্মোচন কৰি শিক্ষাবিদ লক্ষ্মী নাৰায়ণ শৰ্মাই নৰসিংহ ক্ষেত্ৰৰ ঐতিহ্য দাঙি ধৰি সাধনা আৰু সিদ্ধি লাভেৰে বাবা ভৃগুগিৰি মহাৰাজে সমাজৰ কল্যাণ সাধন কৰিছিল বুলি মন্তব্য কৰে। স্মৃতিগ্ৰন্থ ‘যজ্ঞামৃত’ উন্মোচন কৰে বৰ্ষীয়ান সমাজসেৱী ৰেখা শৰ্মাই। সতীশ চন্দ্ৰ শৰ্মাৰ সঞ্চালনাত অনুষ্ঠিত গ্ৰন্থ উন্মোচনী সভাখনৰ উদ্দেশ্য ব্যাখ্যা কৰে প্ৰবীণ গোস্বামীয়ে। সভাৰ সঞ্চালক সতীশ চন্দ্ৰ শৰ্মাই নিজৰ ভাষণত বাবা ভৃগুগিৰি মহাৰাজৰ সাধনা আৰু পাণ্ডিত্যৰ বিষয়ে উল্লেখ কৰি কয় যে অসমত পোন প্ৰথমে এজন সাধুৱে অসমীয়া ভাষাত বেদৰ ওপৰত ভাষ্য আগবঢ়াইছিল।
আনহাতে আজি পুৱা ৬ বজাত পণ্ডিতসকলৰ নগৰ পৰিক্ৰমা আৰু বেদধ্বনিৰে দিনটোৰ কাৰ্যসূচী আৰম্ভ হয়। কাইলৈ ১০৮ কুণ্ডৰ মহামৃত্যুঞ্জয় যজ্ঞ আৰু স্হিৰ প্ৰাণ প্ৰতিষ্ঠা মহোৎসৱৰ অন্তিম দিনৰ কাৰ্যসূচীত পুৱা ১১ বজাত কুমাৰী পূজা আৰু দুপৰীয়া ১২ বজাত যজ্ঞৰ পূৰ্ণাহুতি সম্পন্ন হব। আজিও নৰসিংহ ক্ষেত্ৰত বৃহৎ সংখ্যক ভক্তৰ সমাগম ঘটে ।
