ASSAM TIMES POST
বনানী শৰ্মাৰ ৰিপ’ৰ্ট
মনত আগ্ৰহ থাকিলে, নজনা কামকো মনপুতি কৰিলে যে সফল হ’ব পৰা যায় তাৰেই উদাহৰণ দাঙি ধৰিছে মৰাণৰ বোৱাৰী নিমিষা সন্দিকৈয়ে। নাৰী সৱলীকৰণক লৈ ভিন্ন মহলত চৰ্চা অব্যাহত থকাৰ সময়তে নিমিষা সন্দিকৈৰ দৰে নাৰীয়ে নিজে প্ৰতিষ্ঠা লাভ কৰাৰ লগতে আনকো সংস্থাপনৰ বাট দেখুৱাইছে।
ফেশ্বন ডিজাইনিং সম্পৰ্কীয় আনুষ্ঠানিক শিক্ষা গ্ৰহণ নকৰাকৈয়ে তেওঁ ২০১১ চনৰপৰা শিশুসকলৰ উপৰিও ভিন্ন বয়সৰ লোকৰ বাবে সুন্দৰ সাজ-পোছাক প্ৰস্তুত কৰি দহৰ মন জয় কৰিবলৈ সক্ষম হৈছে। তেওঁ বিশেষকৈ শিশুসকলৰ সাজ-পাৰ আৰু মহিলাৰ বাবে চাদৰ-মেখেলা আৰু ব্লাউজৰ ডিজাইনৰ কাম কৰে।
ফেশ্বন ডিজাইনিং সম্পৰ্কীয় শিক্ষা গ্ৰহণ নকৰিলেও তেওঁ মাকৰপৰাই হাতৰ চিলাই কৰিবলৈ শিকাৰ লগতে ইউটিউব চেনেল আৰু গৃহ বিজ্ঞান(হ’ম ছায়েন্স)ৰ কিতাপৰপৰা ফেশ্বন জিজাইনিং সম্পৰ্কীয় শিক্ষা আহৰণ কৰে।
এই সন্দৰ্ভত নিমিষা সন্দিকৈয়ে কয়, ‘শিশুসকলৰ বাবে বিশেষ অনুষ্ঠান যেনেঃ জন্মদিন, অন্নপ্ৰসন্ন আদিত কন্যা শিশুক পৰম্পৰাগত ডিজাইনৰ ফ্ৰক,স্কাৰ্ট-টপ, চাদৰ-মেখেলাৰ ফিউজন কৰি লেহেংগা পিন্ধাব পাৰে। ইফালে ল’ৰাক ধূতী-কূৰ্তা, কূৰ্তা আৰু ফৰ্মেল পেন্ট পিন্ধালে ভাল দেখিব।’
লগতে তেওঁ কয় যে গৰমৰ দিনকেইটাত সৰু ল’ৰা-ছোৱালীক টিউছন, গান-নাচ, আৰ্টৰ ক্লাছলৈ তথা ফুৰাবলৈ নিলে কপাহী (কটন) কাপোৰ এযোৰ পিন্ধালে বৰ আৰামদায়ক হোৱাৰ লগতে তেওঁলোকক ধুনীয়াও দেখাব।
নিমিষা সন্দিকৈয়ে শিশুৰ সাজ-পোছাকৰ ভিতৰত বেছিকৈ ছোৱালীৰ বাবে স্কাৰ্ট-টপ, ফ্ৰক আদি পৰম্পৰাগত ডিজাইনত ফিউজন কৰি প্ৰস্তুত কৰে। বৰ্তমান তেওঁ ব্যস্ত পূজাৰ বাবে বিশেষকৈ মহিলা আৰু শিশুসকলৰ সাজ-পোছাক প্ৰস্তুতৰ কামত।
