নিউজ ডেস্কঃ
ইয়াকে কয় সন্তানৰ প্ৰতি প্রেম আৰু দায়বদ্ধতা। যাৰ কোনো তুলনা নহয়। এই লকডাউনৰ মাজতো সন্তান প্রেমৰ অনন্য নজিৰ ৰাখিলে কর্ণাটকৰ মহিশূৰ জিলাৰ কোপ্পালু গাঁৱৰ আনন্দে। তেওঁৰ ১০ বছৰীয়া পুত্ৰ দীর্ঘদিন ধৰি অসুস্থ। ঔষধৰ প্রয়োজন। কিন্তু লকডাউনৰ বাবে চলা নাই গাড়ী। অগত্যা সন্তানৰ প্রাণ বচাবলৈ তীব্র গৰম আৰু ৰ’দক উপেক্ষা কৰি ৩০০ কিলোমিটাৰ চাইকেল চলাই ঔষধ লৈ আহিল আনন্দে। তেওঁৰ সন্তান বিশেষভাবে সক্ষম। তেওঁৰ জীৱন বচাবলৈ আনন্দৰ এই পৰিশ্রমৰ প্রশংসা কৰিছে গাঁওবাসীয়ে।
বিশেষভাবে সক্ষম আনন্দৰ সন্তানৰ বাবে প্রতিদিনে ঔষধৰ প্রয়োজন হয়। ইফালে লকডাউনৰ বাবে ৰাজহুৱা পৰিবহণ বন্ধ। আনহাতে, দুখীয়া পিতৃৰ হাতত ইমান টকাও নাই যে গাড়ী ভাড়া কৰি বেঙ্গালুৰুলৈ গৈ ওষধ আনিব পাৰিব। সেয়ে উপায়ন্তৰ হৈ চাইকেলকেই ভৰসা কৰি ল’লে। ৩০০ কিলোমিটাৰ চাইকেল চলাই ঔষধ লৈ আহে। আনন্দে কয়, ‘আমাৰ পুত্ৰই যি ঔষধ খায় সেয়া ইয়াত পোৱা নাযায়। অথচ প্রতিদিনে তেওঁৰ ঔষধৰ প্ৰয়োজন। চিকিৎসকে কৈছে নিয়মিত ঔষধ খুৱালে ১৮ বছৰ বয়সত তেৱোঁ অন্যান্যসকলৰ দৰে স্বাভাবিক হ’ব। সেয়ে পলম নকৰি চাইকেল লৈয়েই বেঙ্গালুৰু বুলি ৰাওনা হওঁ।’ একেৰাহে তিনিদিন চাইকেল চলাই অসম্ভৱ কঁকালৰ বিষ লৈ সন্তানৰ বাবে ঔষধ লৈ ঘৰলৈ উভতে আনন্দ।
