শ্ৰীমন্ত শঙ্কৰদেৱ সংঘৰ ৮৯ সংখ্যক বাৰ্ষিক অধিৱেশন, বোকাখাত ২০২০ৰ দ্বিতীয় খন কাৰ্যনিবাহক সভা সম্পন্নঃ প্ৰস্তুতি অব্যাহতঃ ১০ নৱেম্বৰত লাইখুটা স্থাপন

ASSAM TIMES POST

বোকাখাতঃ সমাজ সংস্কাৰক আৰু সংগঠক মহামানৱ শ্ৰীমন্ত শংকৰদেৱৰ আদৰ্শৰ ভেঁটিত প্ৰতিষ্ঠিত ভাৰতবৰ্ষৰ সৰ্ব বৃহৎ ধৰ্মীয়, সামাজিক, সাংস্কৃতিক আৰু গণতান্ত্ৰিক অনুষ্ঠান শ্ৰীমন্ত শঙ্কৰদেৱ সংঘৰ ৮৯ সংখ্যক বাৰ্ষিক অধিৱেশন, বোকাখাত ২০২০ ৰ অধিৱেশন ভাগি “বিশ্বঐতিহ্য কাজিৰঙা সমন্বয় ক্ষেত্ৰ”ত অহা ২০২০ চনৰ ফেব্ৰুৱাৰী মাহৰ ৫,৬,৭ আৰু ৮ তাৰিখে দিহিঙীয়া-মহুৰাপথাৰ, কমাৰগাঁও, বোকাখাতত অনুস্থিত হ’ব ৷ ৩১ মাৰ্চ, ২০১৯ত আদৰণী সমিতি গঠন কৰাৰ পিছত অধিৱেশনৰ প্ৰাৰম্ভিক কামকাজ আদৰণী সমিতিয়ে ইতিমধ্যে আৰম্ভ কৰি অব্যাহত ৰাখিছে ৷

সমান্তৰালকৈ উপ সমিতি সমূহে অধিৱেশনৰ যাৱতীয় কাম কাজ সমূহ কৰ্ম আঁচনি অনুযায়ী আগবঢ়াই নিছে ৷ আদৰণী সমিতিৰ কাৰ্যকৰী সভাপতি তথা অসম চৰকাৰৰ কেবিনেট মন্ত্ৰী অতুল বৰাই অধিৱেশনৰখনি সফল কৰা ক্ষেত্ৰত চৰকাৰী ভাৱে বিভিন্ন চৰকাৰী বিভাগৰ সৈতে কেইবালানিও আলোচনাত মিলিত হৈছে ৷

আদৰণী সমিতিৰ কাৰ্যকৰী সভাপতি, স্থানীয় বিধায়ক তথা কেবিনেট মন্ত্ৰী অতুল বৰাৰ উদ্যোগত আদৰণী সমিতিৰ এটি সজাতি দলে বিধান সভা চলি থকা কালত মুখ্যমন্ত্ৰী, গড়কাপ্তানী মন্ত্ৰীৰ লগতে বিভাগীয় মন্ত্ৰী সকলক সাক্ষাৎ কৰি অধিৱেশনৰ দাঁতিকাষৰীয়া অঞ্চল উন্নয়ণৰ বাবে আলোচনাত মিলিত হৈছে ৷

অধিৱেশনলৈ আহিব লগা ভকত-বৈষ্ণৱক যাতে জৈৱিক শাক-পাচলি খুৱাব পাৰে, তাৰ বাবে কৃষিমন্ত্ৰীগৰাকীৰ উদ্যোগত বোকাখাত মহকুমা প্ৰশাসন আৰু মহকুমা কৃষি বিভাগৰ সহযোগত ঐতিহ্যমণ্ডিত মৰিয়াহোলাৰ বিস্তৃত কৃষি ভূমিত ৰবি শস্যৰ খেতি কৰিবৰ বাবে প্ৰস্তুতি আৰম্ভ কৰিছে ৷

আনহাতে বোকাখাতৰ প্ৰাক্তন বিধায়ক জিতেন গগৈয়েও অধিৱেশনলৈ আহিব লগা ভকত-বৈষ্ণৱক অপ্যায়ণৰ বাবে নিজাববীয়াকৈ ৰবি শস্যৰ খেতি কৰাৰ প্ৰস্তুতি আৰম্ভ কৰিছে ৷ মূলতঃ কাৰ্যনিৰ্বাহক সভাত অনাগত অধিৱেশনৰ কামকাজৰ অগ্ৰগতিৰ খতিয়ানৰ বুজ লৈ আলোচনা কৰা হয় ৷ বোকাখাত নাট্য মন্দিৰত অনুষ্ঠিত কাৰ্যনিৰ্বাহক সভাত বিশেষকৈ অৰ্থ সংগ্ৰহৰ ওপৰত বিষদভাৱে আলোচনা কৰা হয় ৷

২ কোটি ৮০ লাখ টকাৰ বাজেটেৰে হ’ব লগা অধিৱেশনখনি সৰ্বাংগ সুন্দৰ কৰাৰ ক্ষেত্ৰত আলোচনা কৰে ৷ আদৰণী সমিতিৰ সভাপতি ধৰ্মেশ্বৰ হাজৰিকাৰ সভাপতিত্বত অনুস্থিত সভাত মূল সংস্কৃতি শাখাৰ সভাপতি পবিত্ৰ প্ৰাণ বৰা, জিলা শাখাৰ সভাপতি যোগেশ লয়িং, সম্পাদক দ্বীজেন্দ্ৰ নাথ ৰাজখোৱা, আদৰণী সমিতিৰ উপদেষ্টা তথা ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱা, দেৱ প্ৰদীপ বৰা, চৈয়দ আনিচুৰ ৰহমান, কেশৱ উপাধ্যায়ৰ লগতে আদৰণী সমিতিৰ ১৫ গৰাকী উপ সভাপতি, ১০ গৰাকী সহকাৰী সম্পাদক, উপ সমিতি সমূহৰ সভাপতি-সম্পাদকৰ লগতে আঞ্চলিক শাখা সমূহৰ সভাপতি সম্পাদকৰ উপৰিও কাৰ্যনিবাহক ১৫১ জন সদস্য উপস্থিত থাকে ৷

নিজৰ ভাষণত শ্ৰীমন্ত শঙ্কৰদেৱ সংঘৰ সংস্কৃতি শাখাৰ সভাপতি পবিত্ৰ প্ৰাণ বৰাই সভাত আদৰণী সমিতিৰ ৩৫ খন উপ-সমিতিৰ বৰ্তমানলৈকে কৰি অহা কামৰ অগ্ৰগতি সম্পৰ্কে বুজ লয় আৰু সকলোকে সততা আৰু নিষ্ঠা সহকাৰে কাম কৰি যাবলৈ সকলোকে আহ্বান জনায় ৷ সভাত অধৱেশনখনি সুন্দৰ ৰূপে পৰিচালনা কৰিবৰ বাবে কেইবাটিও গুৰুত্বপূৰ্ণ সিদ্ধান্ত গ্ৰহণ কৰা হয় ৷

অহা ১০ নৱেম্বৰত অনুষ্ঠিত হ’ব লগা লাইখুটা স্থাপনৰ কাৰ্যসূচীৰ সম্পৰ্কেও সভাত আলোচনা কৰাৰ লগতে কাৰ্যসূচী মূল সংঘৰ অনুমোদনৰ বাবে প্ৰেৰণ কৰাৰ সিদ্ধান্ত গ্ৰহণ কৰে ৷ সমগ্ৰ কাৰ্যসূচীৰ আঁত ধৰে আদৰণী সমিতিৰ সম্পাদক চন্দ্ৰ কান্ত ভূঞাই ৷