নিউজ ডেস্কঃ
দুদিন পূৰ্বে শ্বিলঙত উত্তৰ-পূবৰ ৰাজ্যকেইখনৰ মুখ্যমন্ত্রীসকলৰ সৈতে আলোচনা কৰি গৈছিল কেন্দ্রীয় গৃহমন্ত্রী অমিত শ্বাহে। তাৰ পিছতেই সীমা সংক্রান্তীয় বিবাদক লৈ সংঘর্ষত লিপ্ত হ’ল অসম আৰু মিজোৰোম। সোমবাৰে লায়লাপুৰ সীমান্তৰ কাষত মিজোৰামৰ ফালৰ পৰা অসমৰ চৰকাৰী বিষয়াসকলৰ ওপৰত ইটা, শিল আদি নিক্ষেপ কৰাৰ অভিযোগ উঠিছে। ঘটনাস্থলীত গুলী ফুটা বুলিও খবৰ ওলাইছে। উক্ত ঘটনাত অসম-মিজোৰামৰ মাজত পৰিস্থিতি উত্তপ্ত হৈ উঠে। সীমান্তত বিশাল আৰক্ষী বাহিনী মোতায়েন কৰিছে অসম চৰকাৰে। অসম আৰক্ষীৰ সৈতে মিজোৰামৰ বাসিন্দাসকলৰ সংঘর্ষৰ ভিডিও ইতিমধ্যেই বিয়পি পৰিছে ইণ্টাৰনেটত।
আনহাতে, দুয়োখন ৰাজ্যৰ মুখ্যমন্ত্রীয়েই উক্ত সঙ্ঘাতৰ ভিডিও টুইটাৰত পোষ্ট কৰি প্রধানমন্ত্রী নৰেন্দ্র মোদী আৰু কেন্দ্রীয় গৃহমন্ত্রীৰ হস্তক্ষেপ বিচাৰিছে।
অসম আৰক্ষী আৰু মিজোৰামৰ উক্ত এলেকাৰ স্থানীয় লোকসকলৰ মাজত হোৱা সঙ্ঘাতৰ এটি ভিডিও টুইটাৰত পোষ্ট কৰি মিজোৰামৰ মুখ্যমন্ত্রী জোৰামথাঙ্গাই লিখে, ‘অমিত শ্বাহজি, অনুগ্ৰহ কৰি বিষয়টি তদন্ত কৰি চাওক। এইটো এতিয়াই বন্ধ হোৱা উচিত।’ প্রধানমন্ত্রী নৰেন্দ্র মোদী আৰু অসমৰ মুখ্যমন্ত্রী হিমন্ত বিশ্বশর্মাকো উক্ত টুইটত টেগ কৰিছে তেওঁ। তাৰ পিছতেই অসম আৰক্ষীয়ে কয়, ভূমি বেদখল ৰুধিবলৈ লায়লাপুৰলৈ সীমান্ত পৰিদর্শনৰ বাবে গৈছিল অসম চৰকাৰৰ বিষয়াসকল। সেই সময়তে তেওঁলোকৰ ওপৰত ইটা-শিল নিক্ষেপ কৰে মিজোৰামৰ কোনো দুষ্কৃতিকাৰীয়ে।
ইফালে অসমৰ মুখ্যমন্ত্ৰী হিমন্ত বিশ্ব শৰ্মাইও টুইটাৰত জোৰামথাঙ্গা, কেন্দ্রীয় গৃহমন্ত্রী আৰু প্রধানমন্ত্রীক উদ্দেশ্য কৰিছে লিখে, ‘কোলাচিবৰ (মিজোৰাম) আৰক্ষী অধীক্ষকক সীমান্ত ঘাটিৰ পৰা আঁতৰি যাবলৈ কোৱা হৈছিল। আঁতৰি নগ’লে হিংসাও নকমিব বুলি কোৱা হৈছে। এই পৰিস্থিতিত কেনেদৰে চৰকাৰ চলাব পৰা যায়। অনুগ্ৰহ কৰি সোনকালে বিষয়টিত হস্তক্ষেপ কৰক।’
উল্লেখ্য, যোৱা জুন মাহতো সীমান্ত বিবাদক কেন্দ্ৰ কৰি সঙ্ঘাতৰ ঘটনা ঘটিছিল অসম আৰু মিজোৰামৰ মাজত।
