ছাইদুল ইছলাম
ডিফু : কাৰ্বি আংলং স্বায়ত্ত্বশাসিত পৰিষদৰ নিৰ্বাচন সমাগত হোৱাৰ লগে লগে জিলাখনত প্ৰধান বিৰোধী দল কংগ্ৰেছৰ সাংগঠনিক তৎপৰতা বৃদ্ধি পাবলৈ ধৰা পৰিলক্ষিত হৈছে । কিছুদিন পূৰ্বে সাংসদ আব্দুল খালেক জিলাখনত উপস্থিত হৈ দলীয় নেতা-কৰ্মীসকলক সাক্ষাৎ কৰি দলটোৰ সাংগঠনিক দিশৰ অৱস্থাৰ বুজ লোৱাৰ পিছত আজি ডিফুত উপস্থিত হয়হি কংগ্ৰেছ বিধায়ক তথা প্ৰদেশ কংগ্ৰেছৰ কাৰ্যকৰী সভাপতি কমলাক্ষ দে’ পুৰকায়স্থ আৰু প্ৰাক্তন বিধায়িকা ৰজলীনা তিৰ্কী।
কাৰ্বি আংলং জিলা কংগ্ৰেছৰ ডিফুস্থিত মুখ্য কাৰ্যালয়ত দলটোৰ বিভিন্ন পৰ্যায়ৰ নেতৃবৰ্গৰ সৈতে এক বৰ্ধিত সভাত অংশগ্ৰহণ কৰি কাৰ্যকৰী সভাপতিগৰাকীয়ে দলৰ সাংগঠনিক অৱস্থাৰ বুজ লয় । সাংবাদিকৰে হোৱা বাৰ্তালাপত পুৰকায়স্থই জিলাখনত দলীয় কৰ্মীসকলৰ উৎসাহ দেখি আনন্দিত হোৱা বুলি মন্তব্য কৰাৰ লগতে কাৰ্বি আংলঙত কংগ্ৰেছৰ ভোটৰ পৰিমাণ বৃদ্ধি পাবলৈ লোৱা বুলি মন্তব্য কৰে। পৰৱৰ্তী সময়ত আগন্তুক কাৰ্বি আংলং স্বায়ত্ত্বশাসিত পৰিষদৰ নিৰ্বাচনত বিজেপি দলক প্ৰতিহত কৰাৰ বাবে বিশেষ ৰণনীতি প্ৰস্তুত কৰা হ’ব বুলি নেতাগৰাকীয়ে কয়।
আনহাতে কাৰ্বি আংলং জিলা কংগ্ৰেছৰ সভাপতি খৰছিং ইংতিয়ে দলৰ কৰ্মীসকলক গাঁৱে গাঁৱে গৈ সংগঠন শক্তিশালী কৰাৰ বাবে আহ্বান জনায়। খৰছিং ইংতিৰ সভাপতিত্বত অনুষ্ঠিত হোৱা সভাখনত জিলা কংগ্ৰেছৰ কাৰ্যকৰী সভাপতি অশোক টেৰণ, উপ-সভাপতি ৰতন ইংতি, প্ৰদেশ কংগ্ৰেছৰ মুখপাত্ৰ ডা° মংৱে ৰংপি আদি উপস্থিত থাকে।
