ছাইদুল ইছলাম
ডিফু : অৱশেষত এক সপ্তাহৰ পিছত উদ্বাৰ হ’ল সমগ্ৰ কাৰ্বি পাহাৰ কঁপাই যোৱা চকীহোলাৰ নৃশংস হত্যাকাণ্ডৰ দ্বিতীয়গৰাকী কিশোৰীৰ মৃতদেহ ৷ দ্বিতীয়গৰাকী কিশোৰীৰ মৃতদেহ উদ্ধাৰ হোৱাৰ পিছতেই দুয়োগৰাকী কিশোৰীৰ শিহৰণকাৰী কাণ্ডৰ ভয়ংকৰ ঘটনা পোহৰলৈ আহিছে ৷ কাৰ্বি পাহাৰৰ অতিকৈ দুৰ্গম অঞ্চলত দুগৰাকী কিশোৰীৰ চাঞ্চল্যকৰ হত্যাকাণ্ডই সমগ্ৰ পাহাৰত তীব্ৰ জোকাৰণিৰ সৃষ্টি হৈছে ৷ যোৱা ২৮ আগষ্টত মাছ মাৰিবলৈ গৈছিল দুগৰাকী ১১ বছৰীয়া কিশোৰী আৰু কোনো অচিনাক্ত দুৰ্বৃত্তই হত্যা কৰিছিল দুয়োকে।
এগৰাকী কিশোৰীৰ মৃতদেহ দেওবাৰে উদ্ধাৰ হৈছিল আৰু আনগৰাকী কিশোৰী নিৰুদ্দিষ্ট হৈ আছিল ।
কিশোৰীগৰাকীৰ সন্ধানত নামি পৰিছিল আৰক্ষী, কাৰ্বি ছাত্ৰ সন্থাৰ লগতে হাজাৰ হাজাৰ গাঁওবাসী ।
অৱশেষত এটা সপ্তাহৰ পিছত ক্ষত-বিক্ষত অৱস্থাত পাহাৰৰ এটা জুৰিত উদ্ধাৰ কণমানিজনীৰ মৃতদেহ ।
আজি উদ্ধাৰ হোৱা কিশোৰীজনীৰ দেহতো আঘাতৰ চিহ্ন স্পষ্ট হৈ আছে ৷ উক্ত ঘটনাৰ পিছত সমগ্ৰ গাঁওখনত এতিয়া শোকাকুল পৰিৱেশ বিৰাজ কৰিছে। আৰক্ষীয়ে ইতিমধ্যে গাঁওবাসীক সোধা-পোছ অব্যাহত ৰাখিছে । এতিয়ালৈ কাকো আটক কৰিবলৈ সক্ষম হোৱা নাই আৰক্ষী।
