নিউজ ডেস্কঃ
দিল্লীৰ আদালত কক্ষৰ ভিতৰতেই চলিল গুলী। শুক্রবাৰে দুপৰীয়া এই গুলীয়াগুলীত প্ৰায় তিনিজনৰ মৃত্যু হোৱা বুলি জানিব পৰা গৈছে। ঘটনাটোত আহত হৈছে আন বহুকেইজন। দিল্লীৰ কুখ্যাত দুষ্কৃতিকাৰী জিতেন্দ্র গোগীৰ মৃত্যু হয় এই গুলীয়াগুলীত।
উত্তৰ দিল্লীৰ ৰোহিণীত আদালত কক্ষৰ ভিতৰতেই বিবদমান দুই দলৰ দুষ্কৃতিকাৰীয়ে গুলী চলায়। দুষ্কৃতিকাৰীয়ে অধিবক্তাৰ পোছাক পিন্ধি আদালত কক্ষত প্রবেশ কৰিছিল।
কুখ্যাত দুষ্কৃতিকাৰী গোগীৰ বিৰুদ্ধে একাধিক গোচৰ আছে। যোৱা এপ্রিলত তেওঁক গ্রেপ্তাৰ কৰে দিল্লী আৰক্ষীৰ বিশেষ বিভাগে। তেনে এক গোচৰত আদালতলৈ অনা হৈছিল গোগীক। তেতিয়াই বিৰোধী দলৰ দুষ্কৃতিকাৰীয়ে তেওঁৰ ওপৰত গুলী চলোৱা বুলি প্ৰাৰম্ভিকভাৱে জানিব পৰা গৈছে। গোগীৰ ওপৰত আক্ৰমণৰ ঘটনাত ‘টিল্লু’ দলৰ দুষ্কৃতিকাৰী জড়িত বুলি আৰক্ষীৰ সন্দেহ। দুষ্কৃতিকাৰীৰ গুলীচালনাৰ মাজতেই আৰক্ষীয়েও গুলীৰে প্ৰত্যুত্তৰ দিয়ে। আৰক্ষীৰ গুলীত দুষ্কৃতিকাৰী দলৰ দুজনৰ মৃত্যু হোৱা বুলি অনুমান কৰা হৈছে। সংবাদ সংস্থা এএনআইৰ সূত্র মতে, শুক্রবাৰৰ উক্ত ঘটনাত আদালত চৌহদৰ ভিতৰত ৩৫-৪০ ৰাউন্ড গুলী চলে। তাত কর্মৰত এগৰাকী মহিলা উকীলো আহত হৈছে।
জানিব পৰা মতে, দিল্লীৰ উক্ত দুই গেঙৰ মাজত বিবাদ দীর্ঘদিনৰ। বিগত কেইবা বছৰত তেওঁলোকৰ মাজত যুঁজত ২৫ জনৰো অধিক ব্যক্তিৰ প্রাণ গৈছে।
