নিউজ ডেস্কঃ
গৰু, ম’হ বা ছাগলীৰ গাখীৰ বহুতেই খাইছে৷ কিন্তু গাধৰ গাখীৰ কেতিয়াবা খাইছেনে? নেচনেল ৰিছার্চ চেণ্টাৰ অন ইক্যুইনছ(NRCE)ৰ উদ্যোগত হাৰিয়ানাত খুলিবলৈ আগবাঢ়িছে ভাৰতবর্ষৰ সর্বপ্রথম গাধৰ গাখীৰৰ ফাৰ্ম। হালাৰি প্রজাতিৰ গাধ সাধাৰণতে গুজৰাটত দেখা পোৱা যায়। হাৰিয়ানাৰ হিসাৰ এলেকাত উক্ত ফাৰ্মৰ কাম আৰম্ভ হ’ব খুব সোনকালেই। ইয়াত কেৱল হালাৰি প্রজাতিৰ গাধৰ গাখীৰ সংগ্রহ কৰা হ’ব। গুজৰাটৰ পৰা ১০টা হালাৰি প্রজাতিৰ গাধ হিসাৰলৈ অনা হৈছে।
সিহঁতক খুওৱা হৈছে পুষ্টিকৰ খাদ্য, লোৱা হৈছে যত্ন, যাতে গাখীৰ প্ৰদানৰ উপযুক্ত হৈ উঠে। এনআৰচিইৰ বিশেষজ্ঞসকলৰ মতে, গাধৰ গাখীৰত প্রচুৰ পৰিমাণে এন্টি-অক্সিডেন্ট থাকে, যিয়ে মানৱ দেহত ৰোগ প্রতিৰোধ ক্ষমতা বৃদ্ধিত সহায় কৰে। কৰোনা পৰিস্থিতিত মানৱ দেহত ৰোগ প্রতিৰোধ ক্ষমতা কিমান জৰুৰী সেয়া সকলোৱেই জানে। গাধৰ গাখীৰ কেন্সাৰৰ দৰে মাৰণ ৰোগতো উপকাৰী। যিসকলৰ অতিৰিক্ত ওজনৰ সমস্যা আছে, তেওঁলোকৰ ক্ষেত্রতো গাধৰ গাখীৰ উপকাৰী।
যিসকলে লেক্টো এলার্জিৰ বাবে গাখীৰ খাব নোৱাৰে, তেওঁলোকেও গাধৰ গাখীৰ অনায়াসে খাব পাৰিব। শিশুসকলেও গাধৰ গাখীৰ খাব পাৰিব, কাৰণ গাধৰ গাখীৰত কোনো এলার্জিৰ বস্তু নাই।
কিন্তু গাধৰ গাখীৰৰ দাম শুনিলে আপোনাৰ চকু কপালত উঠিব। সূত্রৰ খবৰ অনুযায়ী, ১ লিটাৰ গাধৰ গাখীৰৰ দাম হ’ব ৭০০০ টকা।
