নিউজ ডেস্কঃ
নাগালেণ্ডৰ গুলীচালনাৰ ঘটনা সন্দৰ্ভত বিবৃতি জাৰি অসম ৰাইফলছৰ। বিবৃতিত উক্ত ঘটনাৰ বাবে ‘গভীৰ অনুতপ্ত’ বুলি প্ৰকাশ কৰিছে। উল্লেখ্য, শনিবাৰে সন্ধিয়া অসম ৰাইফলছৰ গুলীত প্ৰায় ১২ জন গাঁওবাসী নিহত হয়। এই ঘটনাৰ উচ্চ পর্যায়ৰ তদন্তৰ নির্দেশ দিয়া হৈছে বুলিও বিবৃতিটোত জনোৱা হৈছে। তদন্তৰ ভিত্তিত দোষীৰ বিৰুদ্ধে আইনগত ব্যৱস্থা লোৱা হ’ব বুলিও জনোৱা হৈছে। উক্ত ঘটনাত অসম ৰাইফলছৰ এজন বিষয়াও নিহত হয়।
বিবৃতিটোত লগতে কোৱা হৈছে, ‘বিশ্বস্ত চোৰাংচোৱা সূত্রে খবৰ লাভ কৰিয়েই সন্ত্রাসবাদীক ধৰিবলৈ ওটিং গাঁৱত অভিযান চলায় সেনা জোৱানসকলে।’
এই গুলীচালনাৰ ঘটনাত নাগালেণ্ডৰ মুখ্যমন্ত্রী নেইফিউ ৰিঅ’ইও তদন্তৰ নির্দেশ দিছে। তদন্তৰ বাবে এটি উচ্চ পর্যায়ৰ তদন্তকাৰী দল গঠন কৰা হৈছ।
জানিব পৰা মতে, এখন পিক-আপ ভেনত ওটিং গাঁৱলৈ উভতিছিল গাঁৱৰ লোককেইজন। ‘সন্ত্রাসবাদী’ বুলি ভাবি তেওঁলোকক লক্ষ্য কৰি গুলী চলায় নিৰাপত্তা বাহিনীয়ে। কিন্তু দীর্ঘ সময় ধৰি লোক কেইজন ঘৰলৈ উভতি নোযোৱাত তেওঁলোকৰ সন্ধানত ওলায় গাঁওবাসী। এখন ট্রাকৰ ভিতৰত তেওঁলোকৰ মৃতদেহ উদ্ধাৰ হয়। পৰৱৰ্তী সময়ত উত্তেজিত গাঁওবাসীয়ে দা-বন্দুকেৰে আক্ৰমণ কৰে জোৱানসকলৰ ওপৰত।
ইতিমধ্যে এই ঘটনাত গভীৰ উদ্বেগ প্ৰকাশ কৰিছে গৃহমন্ত্ৰী অমিত শ্বাহে। লগতে সকলোকে শান্তি সম্প্ৰীতি বজাই ৰখাৰো আহ্বান জনাইছে।
