নিউজ ডেস্কঃ
দেশত ওমিক্রন আক্রান্তৰ সংখ্যা ২০০লৈ বৃদ্ধি। আক্রান্তৰ হিচাবত শীর্ষত আছে দিল্লী আৰু মহাৰাষ্ট্র। দুয়োখন ৰাজ্যতে কৰোনাৰ নতুন প্রজাতিত ৫৪ জন আক্রান্তৰ সন্ধান পোৱা গৈছে।
আনহাতে, দেশত ৭৭জন ওমিক্রন আক্রান্ত সুস্থ হোৱা বুলি জনাইছে কেন্দ্রীয় স্বাস্থ্য মন্ত্ৰালয়ে। দিল্লী আৰু মহাৰাষ্ট্রৰ পিছতেই আছে তেলেংগানা। ৰাজ্যখনত ২০ জন ওমিক্রন আক্রান্তৰ সন্ধান পোৱা গৈছে। আক্রান্তৰ হিচাবত ইয়াৰ পিছত আছে যথাক্রমে কর্নাটক (১৯), ৰাজস্থান (১৮), কেৰালা (১৫), গুজৰাট (১৪)।
ইফালে কেন্দ্রীয় স্বাস্থ্য মন্ত্ৰালয়ৰ মঙ্গলবাৰৰ তথ্য মতে, বিগত এটা দিনত সমগ্ৰ দেশত কৰোনাত আক্রান্ত হৈছে ৫,৩২৬ জন। যিটো বিগত ৫৮১ দিনত সর্বনিম্ন। দেশত বৰ্তমান সক্রিয় কোভিড ৰোগীৰ সংখ্যা ৭৯ হাজাৰ ৯৭। এই পর্যন্ত দেশত কৰোনা আক্রান্ত হৈছে ৩ কোটি ৪৮ লাখ।
বিগত এটা দিনত দেশত কোভিডত মৃত্যু হৈছে ৪৫৩ জন। মহামাৰিৰ ফলত ভাৰতত প্রাণ গৈছে ৪ লক্ষ ৭৮ হাজাৰজনৰ।
