ASSAM TIMES POST
ছইদুল ইছলাম, ডিফুঃ ডকমকাৰ অপহৃত ব্যৱসায়ী বিজয় আগৰৱালাক কাৰবি আংলং জিলাৰ হাওৰাঘাটৰ পৰা আৰক্ষীয়ে সুস্থ শৰীৰে উদ্ধাৰ কৰাৰ লগতে তিনিজনকৈ অপহৰণ কাৰীক আৰক্ষীয়ে আটক কৰা ঘটনা বিজেপি আৰু ইএম ৰতন টেৰণৰ নাম সাঙুৰি সবিস্তাৰে সংবাদ মাধ্যমত প্ৰকাশ পোৱাৰ পিছত আজি প্ৰথম বাৰৰ বাবে প্ৰতিক্ৰিয়া ব্যক্ত কৰিছে কাৰ্বি আংলং স্বায়ত্ত শাসিত পৰিষদৰ কাৰ্যবাহী সদস্য তথা পূব কাৰ্বি আংলং বিজেপিৰ সভাপতি ৰতন টেৰণে৷
আজি কাৰ্যবাহী সদস্য গৰাকীৰ চৰকাৰী বাসভৱনত এক সংবাদ মেল আয়োজন কৰি কাৰ্যবাহী সদস্য ৰতন টেৰণে প্ৰথমতে অপহৰণ কাৰ্যক তীব্ৰ গৰিহণা দিয়ে আৰু জিলা আৰক্ষী প্ৰশাসনে নিৰাপদে অপহৃতা ব্যৱসায়ীক উদ্ধাৰ কৰাৰ বাবে ধন্যবাদ জনায়৷ সমান্তৰালকৈ গ্ৰেপ্তাৰ হোৱা তিনি অপৰাধীক কঠোৰৰ পৰা কঠোৰতম শাস্তি প্ৰদান কৰিবলৈকো দাবী উত্থাপন কৰে৷
আনহাতে কাৰ্যবাহী সদস্য গৰাকীয়ে সমগ্ৰ ঘটনাক লৈ একাংশ বৈদ্যুতিন আৰু ছপা মাধ্যমত তেওঁৰ নাম আৰু ইয়াৰ মাজত বিজেপি দলক সাঙুৰি লোৱা কাৰ্যত তেওঁ মনোকষ্ট পাইছে বুলি মন্তব্য কৰিছে৷ তেওঁ ইয়াকো কয় যে, হাওৰাঘাটত থকা অপহৰণকাৰী তপন টেৰণ তেওঁৰ ভাতৃ হয় যদিও পৰিয়াল কেন্দ্ৰিক সংঘাতৰ বাবে বহু পূৰ্বেই তেওঁ আৰু তেওঁৰ পৰিয়ালৰ সদস্যৰ সৈতে সম্পৰ্ক বিচ্ছিন্ন হৈ আছে৷
উক্ত ঘটনাৰ বাবে ইএম ৰতন টেৰণৰ নাম সাঙুৰ খাই পৰাটো দূৰ্ভাগ্যজনক৷ এগৰাকী বিজেপি নেতা-কৰ্মী আৰু ইএম হিচাপে তেওঁৰ কাৰ্যকালত আজিলৈকে কোনো কালিমা সানিব পৰা নাই, একনিষ্ঠ আৰু সততাৰে বিজেপি আৰু দলক সেৱা আগবঢ়াই গৈছে৷ সেয়ে এটা অপৰাধ মূলক ঘটনাত তেওঁৰ নাম সাঙুৰি তেওঁৰ ৰাজহুৱা জীৱন বিতৰ্কৰ মাজত ঠেলি বাতৰি পৰিবেশন নকৰিবলৈ ইএম ৰতন টেৰণে সংবাদ মেল যোগে সাংবাদিক সকলৰ প্ৰতি অনুৰোধ জনাইছে।
