নিউজ ডেস্কঃ
নাম তেওঁৰ ক্লাইভ জোনছ৷ তেওঁ এজন অৱসৰপ্রাপ্ত চিকিৎসক। অতি সাধাৰণ মানুহ। কিন্তু তেওঁ ১২৯টা সন্তানৰ পিতৃ! আচৰিত হৈছে নেকি? আচৰিত নহ’ব৷ কাৰণ তেওঁ প্ৰত্যক্ষভাৱে ইমানকেইজন সন্তানৰ পিতৃ নহয়৷ মাতৃও এগৰাকী নহয়। আচলতে বীৰ্য দান কৰিহে তেওঁ ১২৯টা সন্তানৰ পিতৃ হৈছে। ক্লাইভৰ দাবী, তেৱেঁই পৃথিৱীৰ সকলোতকৈ ফলপ্রসূ বীর্যদাতা। ১২৯ সন্তানতো আছেই আন ৯টা আকৌ মাতৃগর্ভত আছে, পৃথিৱীৰ পোহৰ দেখাৰ অপেক্ষাত।
হয়, বলিউড চিনেমা ‘ভিকি ডোনাৰ’ৰ কথা মনত আছেনে? ভিকিয়ে দান কৰা বীর্যৰে কিমানজন সন্তান ধাৰণত অক্ষম দম্পতিৰ সংসাৰ আলোকিত হৈ উঠিছিল। ক্লাইভ জোনছ যেন বাস্তৱৰ সেই ভিকি। ক্লাইভে জনাইছে, তেওঁৰ বীর্যৰ পৰা জন্ম হোৱা সন্তানসকলৰ ২০ জনৰ সৈতে সাক্ষাতো কৰিছে তেওঁ। তেওঁৰ ইচ্ছা, সকলো মিলাই ১৫০টা সন্তান জন্ম দিয়াত সহায় কৰিব বিচাৰে।
স্পার্ম বেঙ্কৰ জৰিয়তে দান কৰিব পৰা নাছিল ক্লাইভে। সেয়ে ফেচবুকৰ জৰিয়তে কাম আৰম্ভ কৰে। ফেচবুকত স্পার্ম বিচাৰি বহু মানুহে বিজ্ঞাপন দিয়ে। তাত সঁহাৰি জনাবলৈ আৰম্ভ কৰে ক্লাইভে। ইয়াৰ বাবে নলয় কোনো টকা-পইচা। অৱশ্যে কিছু কিছু ক্ষেত্রত পেট্র’ল বিচাৰে তেওঁ। ১৯৭৮ চনত বিয়া হৈছিল তেওঁৰ৷ কিন্তু বৰ্তমান তেওঁৰ পত্নী লগত নাথাকে। ৯ বছৰ ধৰি বীর্য দান কৰি আহিছে তেওঁ।
