নিউজ ডেস্কঃ
হাতত অফুৰন্ত সময় আছে? ভ্ৰমণ কৰি ভালপায়? টকাৰো অভাৱ নাই? তেনেহ’লে এবাৰ বাছত উঠি লণ্ডন যাব নেকি? দিল্লীৰ পৰা পোনে পোনে লণ্ডন।
মাজতে আৰু বহু কেইখন দেশ। সময় লাগিব মুঠ ৭০ দিন। বিচাৰিলেই যাব পাৰে। এইবাৰ এই সেৱা আনিছে হাৰিয়ানাৰ এটি কোম্পানীয়ে। অহা ছেপ্টেম্বৰৰ পৰা আৰম্ভ হ’ব এই সেৱা।
অৱশ্যে ইয়াৰ পূৰ্বেও আছিল এই বাছ সেৱা। কলকাতাৰ পৰা দিল্লী হৈ লণ্ডনলৈ গৈছিল বাছখন। সেয়া ১৯৫৭ চনৰ কথা। কেইবা বছৰো ধৰি চলিছিল উক্ত বাছ সেৱা। তাৰ পিছত এটি দুর্ঘটনাৰ কবলত পৰাত বন্ধ হৈ যায় বাছখনৰ সেৱা।
পিছত পুনৰ ছিডনিৰ পৰা কলকাতা হৈ লণ্ডনলৈ গৈছিল। ১৯৭৬ চনলৈ চলিছিল উক্ত দুই মহলীয়া বাছখন। ইয়াৰ পিছত ইৰান আৰু ভাৰত–পাকিস্তানৰ ৰাজনৈতিক কাৰণত উক্ত সেৱা বন্ধ হয়। এইবাৰ ৪৬ বছৰ পিছত পুনৰ আৰম্ভ হ’ব উক্ত সেৱা।
কিন্তু এইবাৰ চলিব বেলেগ পথেৰে৷ প্রথমে দিল্লীৰ পৰা কলকাতা, তাৰ পিছত ম্যানমাৰ। তাৰ পৰা থাইলেণ্ড, লাওছ, চীন, কিৰঘিজস্তান, উজবেকিস্তান, কাজাখস্তান, ৰাছিয়া, লাটাভিয়া, পোলেণ্ড, চেক গণতন্ত্র, জার্মানী, নেদাৰলেণ্ড, বেলজিয়াম আৰু ফ্রান্স হৈ লণ্ডনত উফস্থিত হ’ব। মুঠ ২০ হাজাৰ কিলোমিটাৰ পথ ভ্ৰমণৰ বাবে সময় ল’ব ৭০ দিন।
২০খন আসনৰ বাছখন প্রত্যেক যাত্রীৰ বাবে থাকিব পৃথক কেবিন, থাকিব আধুনিক সা–সুবিধাও। ভাৰা হ’ব প্ৰতিজনৰে ১৫ লাখকৈ। যাৱতীয় সকলো নথি-পত্ৰও দিব কোম্পানীটোৱেই৷
