নিউজ ডেস্কঃ
নিৰ্বাচনৰ মাজতেই ভয়াৱহ দুর্ঘটনা উত্তৰ প্রদেশৰ কুশীনগৰত। এখন বিয়াঘৰত কুঁৱাত পৰি মৃত্যু হয় ১৩গৰাকী মহিলা। তেওঁলোকৰ বয়স ২০-৩৫ৰ ভিতৰত মধ্যে। আহত হয় আন দুজন। প্ৰায় ১৫ জনক গাঁওবাসীয়ে উদ্ধাৰ কৰিবলৈ সক্ষম হয় বুলি জানিব পৰা গৈছে।
উক্ত ঘটনাত শোক প্রকাশ কৰিছে প্রধানমন্ত্রী নৰেন্দ্র মোদী আৰু উত্তৰ প্রদেশৰ মুখ্যমন্ত্রী যোগী আদিত্যনাথে।
জানিব পৰা মতে, বুধবাৰে নিশা কুশীনগৰ জিলাৰ নেবুৱা নউৰঙ্গিয়া গাঁৱত বিয়াৰ অনুষ্ঠান আছিল। তাত এটি কুঁৱাৰ পাৰত ঢাকি থোৱা স্থানৰ ওপৰত বহিছিল প্ৰায় ২৫-৩০ গৰাকী মহিলা আৰু শিশু। ইমান কেইজনৰ ভৰ সহিব নোৱাৰি ভাঙি পৰে কুঁৱাৰ পাৰ। ফলত পানীত পৰি যায় সকলোৱেই। মৃত্যু হয় ১৩ গৰাকীৰ। নিশা ৮.৩০ বজাত ঘটনাটি ঘটে। মুহূর্ততে হুলস্থুল লাগি যায় বিয়াঘৰত। উদ্ধাৰকাৰ্যত নামি পৰে সকলোৱে। গাঁওবাসীয়ে শিশু আৰু মহিলাসহ ১৫ জনক উদ্ধাৰ কৰিব পাৰিলেও, ১৩ জনৰ পানীত ডুবি মৃত্যু হয়।
মৃতকৰ পৰিয়ালক ৪ লাখ টকাকৈ আর্থিক সাহায্য দিয়াৰ কথা ঘোষণা কৰা হৈছে।
