ষ্টাফ ৰিপ’ৰ্টাৰ
ডিফু : কাৰবি আংলং-নাগালেণ্ড সীমান্তৰ খটখটীত পুণৰ উদ্ধাৰ হৈছে নিচাযুক্ত দ্ৰব্য ৷ প্ৰাপ্ত খবৰ অনুসৰি এক গোপন খবৰৰ ভিত্তিত খটখটী থানাৰ অ’চি ৰাজু দুৱৰাৰ নেতৃত্বত উপ-পৰিদৰ্শক আতিকুৰ ৰহমান চিআৰপিএফ ষ্টাফ কেম্প আৰু বোকাজান থানাৰ ষ্টাফৰ সহযোগত আজি পুৱা খটখটী ষ্টেট বেংকৰ ওচৰত এক বিশেষ নাকা তালাচী বহোৱা হয় ৷
উক্ত সময়ত মৰিগাওঁ জিলাৰ মৈৰাবাৰীৰ পৰা ডিমাপুৰ অভিমুখে আহি থকা AS-02-AC-8750 নম্বৰৰ এখন যাত্ৰীবাহী বাছত তালাচী চলাই তিনি পেকেট নিচাযুক্ত দ্ৰব্য ট্ৰেমাড’ল পাওডাৰ উদ্ধাৰ কৰিবলৈ সক্ষম হয় ৷ জব্দকৃত ট্ৰেমাডল পাওডাৰখিনিৰ ওজন ৫৬৭ গ্ৰাম বুলি জানিব পৰা গৈছে ৷ নিচাযুক্ত ট্ৰেমাডল পাওডাৰখিনিৰ সৈতে অভিযানকাৰী দলটোৱে মৰিগাওঁ জিলাৰ লাহৰিঘাটৰ নাগাবান্ধা নিৱাসী নুৰ ইছলামৰ পুত্ৰ ইক্ৰামুল হক (৩৩) আৰু আৰু নগাওঁ জিলাৰ ধিং থানা এলেকাৰ বেছামাৰী গাঁৱৰ ৰজব আলীৰ পুত্ৰ আছাদুল হক (২৯)ক আটক কৰিবলৈ সক্ষম হৈছে ৷
উদ্ধাৰ হোৱা ড্ৰাগছখিনি বোকাজান মহকুমাধিপতি জন জাসৰ উপস্থিত জব্দ কৰা হৈছে বুলি জানিব পৰা গৈছে ৷
