ছাইদুল ইছলাম
ডিফু : কাৰবি আংলঙত শাসকীয় বিজেপি দল আৰু বিৰোধী ৰাজনৈতিক দলৰ মাজত সংঘাত ক্ৰমাৎ স্পষ্ট হৈ পৰিছে ৷ দুয়োদলৰ নেতা-কৰ্মীৰ বাক্ যুদ্ধই চৰম ৰূপ লৈছে ৷ আজি বিজেপিৰ কাৰবি আংলঙৰ জনজাতি মৰ্চাই অল পাৰ্টী হিলছ লীডাৰ কনফাৰেন্স চমুকৈ এপিএইছএলচিৰ সভাপতি অৱসৰ প্ৰাপ্ত আইএছ বিষয়া জে আই কাথাৰৰ পুত্তলিকা ডিফু চহৰৰ মাজত দাহ কৰাৰ লগতে ডিফু চহৰৰ মাজেৰে সমদল কৰি গৈ ডিফু থানাত জে আই কাথাৰৰ বিৰুদ্ধে এজাহাৰ দাখিল কৰে ৷
ইয়াৰ পূৰ্বে বিজেপিৰ জনজাতি মৰ্চাৰ ৰাজ্যিক সম্পাদক লংচিং টকবিয়ে জিলা প্ৰেছ ক্লাৱত এক সংবাদমেল আয়োজন কৰি জে আই কাথাৰৰ বিৰুদ্ধে তীব্ৰ বিষোদগাৰ প্ৰকাশ কৰে ৷ জেআই কাথাৰে কালি এক সংবাদমেলৰ আয়োজন কৰি শাসকীয় বিজেপি দলৰ নেতা-কৰ্মীক বান্দৰৰ সৈতে তুলনা কৰাৰ অভিযোগ তুলি বিজেপিৰ জনজাতিৰ মৰ্চাৰ সম্পাদক লংচিং টকবীয়ে এনে মন্তব্যক কঠোৰ ভাষাৰে গৰিহণা দিয়ে ৷ এনে মন্তব্যৰে এপিএইছএলচিৰ নেতা গৰাকীয়ে পৰিষদৰ নিৰ্বাচিত প্ৰতিনিধিসকলক অপমানিত কৰাৰ লগতে ভোটাৰ ৰাইজকো অপমানিত কৰিলে ৷ জন ইংতি কাথাৰক সমাজ জীৱনলৈ অৱদান কিমান বুলি প্ৰশ্ন কৰে ৷ কাথাৰৰ তিনি পুত্ৰৰ এজনেহে কাৰবি ভাষা কোৱাত সক্ষম বুলি ক্ষোভ উজাৰে ৷
সংবাদমেলৰ পিছত পুত্তলিকা দাহ কাৰ্যসূচীত বিজেপিৰ জনজাতি মৰ্চাৰ ৰাজ্যিক সম্পাদক লংচ্ং টকবীয়ে কয় যে, কাথাৰৰ বিৰুদ্ধে এজাহাৰ দাখিল কৰাৰ পিছত পৰৱৰ্তী কাৰ্যসূচী হিচাপে তেওঁৰ আৱাস গৃহ ঘেৰাও কাৰ্যসূচী গ্ৰহণ কৰা হ’ব বুলি মন্তব্য কৰে ৷
