ছাইদুল ইছলাম
পৰাম্পৰাগত লোক কৃষ্টিৰ অপূৰ্ব সমাহাৰ ঘটিছে ডিফুৰ তাৰালাংচৰ বাকৰিত ৷ সৰু-বৰ পাহাৰৰ নৈসৰ্গিক আৰু নান্দনিক পৰিবেশৰ মাজত তাৰালাংচ’ৰ বৃহৎ সাংস্কৃতিক প্ৰকল্পত চতুৰ্থ দিনাও উখল-মাখল পৰিবেশ ৷ কাৰবি আংলঙ আৰু ডিমা হাছাওৰ বাহিৰেও অসমৰ বিভিন্ন প্ৰান্তৰ প্ৰায় ৫ সহস্ৰাধিক শিল্পীয়ে তাৰালাংচৰ বাকৰিত পৰাম্পৰাগত নৃত্য, গীত আৰু বিভিন্ন প্ৰতিযোগিতাৰে মুখৰিত কৰি ৰাখিছে৷ কাৰবি যুৱ মহোৎসৱৰ বাবে তাৰালাংচ’ৰ বৃহৎ প্ৰকল্পত থকা স্থায়ী আচেথাই (মুকলি মঞ্চ) সমূহত জনজাতীয় যুৱ শিল্পীসকলে নিজৰ নিজৰ শিল্প শৈলী প্ৰদৰ্শন কৰি আহিছে ৷ ৮২৭ বিঘা মাটি কালিৰ সমগ্ৰ তাৰালাংচত গঢ়ি উঠা বিভিন্ন জনগোষ্ঠীয় গৃহসমূহত জনগোষ্ঠীয় খাদ্য সম্ভাৰৰ সোৱাদ লোৱাৰ লগতে কাৰবি, ডিমাচা, গাৰো-ৰাভা, গোৰ্খা, ৰেংমা নগা, তাই আহোম, পাইতে আদি জনগোষ্ঠীয় লোকৰ জীৱন প্ৰণালীৰ লগত পৰিচিত হয় ৷
যুৱ মহোৎসৱটিৰ আৰম্ভণিৰ দিনৰে পৰাই তাৰালাংচৰ চৌদিশে শৃংখলাবদ্ধভাৱে সজাই তোলা প্ৰদৰ্শনী, গ্ৰন্থ বিপনী, আত্মসহায়ক গোটৰ মেলাস্থলী, কুটীৰশিল্প, ভোজমেলা যুৱক-যুৱতীসকলৰ নৃত্যগীতে দৰ্শকসকলক চাৰিটা দিন আত্মবিভোৰ কৰি ৰাখে ৷ জনগোষ্ঠীয়, খাদ্য সম্ভাৰৰ ফুৰফুৰীয়া গোন্ধই তাৰালংচৰ চৌপাশ আমোল মোলাই ৰাখিছে ৷ বিশেষকৈ কাৰবি জনজাতীয় খাদ্য সম্ভাৰ, বি-অক (ছাগলী মাংস), ফাক’-অক (গাহৰি মাংস), ৱ’- অক ( কুকুৰা মাংস), আন কিমুঙ (চুঙাত দিয়া ভাত), আন কিউপ (সিজুৱা ভাত), বাৰা আচিৰজা (ভাপত দিয়া ভাত), ৱক লাংপং কিমুঙ, ৱক কিমুঙ (পাতত দিয়া ভাত) আদিয়ে যুৱ মহোৎসৱলৈ অহা লোকসকলত তৃপ্তি প্ৰদান কৰে ৷
আজিৰ কাৰ্যক্ৰমণিকা অনুসৰি পুৱা থং নকবে মাৰাথান দৌৰৰ পৰা আৰম্ভ কৰি যুৱ মহোৎসৱটি কবিতা লিখা, আকষ্মিক বক্তৃতা, তৰ্ক প্ৰতিযোগিতা, পৰাম্পৰাগত ক্ৰীড়া হামবি কেপাথু, চানচুৰি কাচিংদৈ (বাঁহ টনা) সমবেত সংগীত আৰু মিছ কেৱাইএফ ২০২২ অনুষ্ঠিত হৈ যায় ৷
৪৮ সংখ্যক কাৰবি যুৱ মহোৎসৱে বিভিন্ন ঠাইত সিঁচৰিত হৈ থকা কাৰবিসকলক সমবেত কৰাৰ এক মহান প্ৰচেষ্টা তথা ঐতিহ্যময় কাৰবি পৰাম্পৰাগত লোক- কৃষ্টি সংস্কৃতিৰ উন্নয়ণ, বিকাশ আৰু সংবৰ্দ্ধনৰ বাবে কাৰবি পিপুলছ হলছ তাৰালাংচক প্ৰতিবছৰে আধুনিকৰ পৰা আধুনিকতম ৰূপ দিয়াৰ প্ৰয়াস কৰি থকা হৈছে বুলি কয় ৷ তাৰালাংচলৈ প্ৰৱেশ কৰা বাট-পথসমূহ কাৰবি আংলং স্বায়ত্তশাসিত পৰিষদৰ মুখ্য কাৰ্যবাহীৰ নেতৃত্বত আটক ধুনীয়াকৈ সজাই পৰাই তোলা হৈছে ৷
