#নগাঁও আৰক্ষীয়ে বহিঃ ৰাজ্যৰ পৰা উদ্ধাৰ কৰিলে দুই কিশোৰী # ভণ্ড প্ৰেমিক আৰু প্ৰেমিকৰ পিতৃক গ্ৰেপ্তাৰ#

নগাঁও, ১০ অক্টোবৰ: আগষ্ট মাহৰ পৰা সন্ধানহীন হৈ থকা নগাঁৱৰ কাটিমাৰীৰ দুগৰাকী কিশোৰীক নগাঁও আৰক্ষীয়ে কালি হাৰিয়ানাৰ পৰা উদ্ধাৰ কৰে। হাৰিয়ানাৰ ৰমেশ কুমাৰ ওৰফে ৰফিক খান নামৰ এজন  লোক আৰু তেওঁৰ পুত্ৰ নুৰ আমিন ওৰফে বুলবুলে কাটিমাৰীৰ কিশোৰী দুগৰাকীক  হাৰিয়ানালৈ যোৱা আগষ্ট মাহতে লৈ গৈছিল।  জানিব পৰা মতে নুৰ আমিন ওৰফে বুলবুলৰ কাটিমাৰীৰ  এগৰাকী কিশোৰীৰ সৈতে আছিল প্ৰেমৰ সম্পৰ্ক। কিন্তু কিশোৰী গৰাকীৰ বিবাহৰ বয়স নোহোৱা বাবে পৰিয়ালৰ লোকে বিয়া দিবলৈ অমান্তি হোৱাত বুলবুলৰ নিজ পৰিয়ালৰ লোকে কিশোৰী গৰাকীক পলুৱাই লৈ যাবলৈ কৈছিল। আনহাতে আনগৰাকী কিশোৰীক হাৰিয়ানাত চাকৰি দিয়াৰ প্ৰলোভনেৰে হাৰিয়ানালৈ লৈ গৈছিল। কিশোৰী দুগৰাকী সন্ধানহীন হৈ  থকা পৰিয়ালৰ লোকে যোৱা আগষ্ট মাহতে হয়বৰগাঁও আৰক্ষী চকীত এজাহাৰ দিছিল যদিও আৰক্ষীয়ে কিশোৰী দুগৰাকীৰ কোনো শুং সূত্ৰ উলিয়াব পৰা নাছিল। আনহাতে হাৰিয়ানাত আবদ্ধ কিশোৰী দুগৰাকীয়ে দুদিন পূৰ্বে নিজৰ অন্ধকাৰ ভৱিষ্যতৰ কথা অনুভৱ কৰি উদ্ধাৰৰ আশাত চিঞৰ বাখৰ কৰাত হাৰিয়ানাৰ স্থানীয় লোকে কিশোৰী দুগৰাকীক ভণ্ড প্ৰেমিক নুৰ আমিনৰ কবলৰ পৰা উদ্ধাৰ কৰি হাৰিয়ানাৰ আৰক্ষীক চমজাই দিয়ে। হাৰিয়ানাৰ আৰক্ষীয়ে কিশোৰী দুগৰাকীৰ স্বীকাৰোক্তিৰ ভিত্তিত পৰিয়ালৰ লোকৰ সৈতে যোগাযোগ কৰে ।কালি কিশোৰী দুগৰাকীৰ ককায়েকে নগাঁও চহৰৰ হয়বৰগাওঁ আৰক্ষী চকীৰ আৰক্ষীক লগত লৈ হাৰিয়ানাৰ পৰা  দুই ভগ্নী আৰু ভণ্ড প্ৰেমিক সহ পিতৃক আটক কৰি অসমলৈ আনে। বৰ্তমানে আটকাধীন দুয়োকে হয়বৰগাওঁ আৰক্ষীয়ে মাৰাথান জেৰা অব্যাহত ৰাখিছে। উল্লেখযোগ্য যে ৰমেশ কুমাৰ হাৰিয়ানাৰ এগৰাকী হিন্দু সম্প্ৰদায়ৰ লোক। তেওঁ নগাঁৱত এগৰাকী মুছলমান মহিলাক বিবাহ কৰিছিল আৰু তেওঁলোকৰ পুত্ৰ হৈছে নুৰ আমিন।ইপিনে কিশোৰী দুগৰাকীয়ে তেওঁলোকক ধৃত লোক দুজনে দুষ্ট চক্ৰৰ ওচৰত বিক্ৰী কৰিব বিচৰা বুলি অভিযোগ কৰিছে।অৱশ্যে আৰক্ষীৰ তদন্ততহে বিষয়টোৰ সত্যতা উন্মোচিত হ’ব । !##