অসম আৰক্ষীৰ পুনৰ আন এক বৃহৎ সফলতা। আজি পুৱতি নিশা চলোৱা এক বিশেষ অভিযানত নগাঁও আৰক্ষীয়ে চাপৰমুখ ৰেল জংচনত আগৰতলা-ৰাণী কমলাপতি যাত্ৰীবাহী চলন্ত ৰেলখনৰ পৰা ১১২ কেজি গাঞ্জা(৮৭ পেকেট) জব্দ কৰিবলৈ সক্ষম হয়।
জিলা অতিৰিক্ত আৰক্ষী অধীক্ষক ধ্ৰুৱ বৰাই সংবাদ মাধ্যম যোগে প্ৰকাশ কৰা মতে, নিশা প্ৰায় ২:৩০ বজাত হোজাই জিলা আৰক্ষীৰ পৰা পোৱা এক খবৰৰ ভিত্তিত চাপৰমুখ ৰেলৱে জংচনত আৰক্ষীৰ দলটো উপস্থিত হয়।
নগাঁও জিলা অতিৰিক্ত আৰক্ষী অধীক্ষক ধ্ৰুব বৰাকে ধৰি উপ আৰক্ষী অধীক্ষক ত্ৰিদিব কুমবঙ, সদৰ আৰক্ষী থানাৰ ভাৰপ্ৰাপ্ত বিষয়া মনোজ ৰাজবংশী, ৰহা আৰক্ষীৰ থানাৰ ভাৰপ্ৰাপ্ত বিষয়া হৃষিকেশ হাজৰিকা আৰু চাপৰমুখ আৰক্ষী চকীৰ ভাৰপ্ৰাপ্ত বিষয়াৰ সৈতে যোৱা অভিযানকাৰী আৰক্ষী দলটোৱে প্ৰায় নিশা ২.৩০ মান বজাত চাপৰমুখ জংচনত উপস্থিত হোৱা নামনিমুৱা আগৰতলা-ৰাণী কমলাপতি (মধ্যপ্ৰদেশ) যাত্ৰীবাহী ৰেলখনৰ বিশেষ ডবাত পৰীক্ষা কৰি ১৬ টা গাঞ্জা পেকেট উদ্ধাৰ কৰে।
আনহাতে, দলটোৱে বিশেষ পদ্ধতিৰে ০৯৪৩২১ নম্বৰৰ ডবাটোত পৰীক্ষণ কৰাত ওলাই পৰে সকলো।
উক্ত ডবাটোৰ বাথৰূমৰ পানীটেংকীৰ ভিতৰত গাঞ্জা সৰবৰাহকাৰীয়ে গাঞ্জাৰ পেকেট লুকুৱাই অনা বুলি এক সূত্ৰ লাভ কৰাত আৰক্ষীয়ে ৰেলখন ৰখাই বিদ্যুত আৰু গেছ কাটাৰ ব্যৱহাৰ কৰি পানী টেংকীৰ চেম্বাৰ কাটি পেলোৱাত ওলাই পৰে আন ৭১ টা গাঞ্জাৰ পেকেট। এই টেংকীটোত চেম্বাৰ সাজি গাঞ্জা সৰবৰাহকাৰীয়ে পলিঠিনেৰে মেৰিয়াই লুকুৱাই আনিছিল ৭১ টা গাঞ্জাৰ পেকেট।
জানিবলৈ পৰা মতে, এই গাঞ্জাৰ পৰিমাণ ১১২ কেজি আৰু ইয়াৰ আনুমানিক বজাৰ মূল্য হৈছে ৩ কোটি টকা। আৰক্ষীৰ এই অভিযানত ৰেলখন প্ৰায় তিনিঘন্টা সময় ৰ’বলগা হৈছিল।
ৰেলখনৰ ডবাৰ ভিতৰত পানী টেংকীত চোৰাং সৰবৰাহকাৰী সকলে অতি বিচক্ষণ আৰু কৌশলেৰে পেকেটিং কৰি এই বৃহত পৰিমাণৰ গাঞ্জা লুকুৱাই অনা ঘটনাই আৰক্ষী প্ৰশাসনৰ লগতে সাধাৰণ জনতাৰো চকু কপালত তুলিছে।
ৰেল বিভাগৰ নিজস্ব সুৰক্ষা বাহিনী থকাৰ পাছতো ৰেলৰ ডবাৰ ভিতৰত লোৰ চেম্বাৰ সাজি কেনেকৈ চোৰাং গাঞ্জা সৰবৰাহকাৰীয়ে বৃহৎ পৰিমাণৰ অবৈধ সামগ্ৰী সৰবৰাহ কৰিবলৈ সক্ষম হোৱাত সকলো আচৰিত হৈছে।
