দেশৰ বৈদেশিক পৰিক্ৰমা মন্ত্ৰী এছ জয়শংকৰৰ উপস্থিতিত এক্ট ইষ্ট বিষয়ক কনক্লেভত অংশ ল’বলৈ অসমলৈ অহা আছিয়ান দেশসমূহৰ প্ৰতিনিধি আৰু চুবুৰীয়া ৰাষ্ট্ৰ বাংলাদেশৰ বৈদেশিক মন্ত্ৰী ড° এ কে আব্দুল মোমেনৰ নেতৃত্বত অহা প্ৰতিনিধি দলৰ সৈতে কইনাধৰাৰ ৰাজ্যিক অতিথিশালাত শুকুৰবাৰে নৈশভোজত অংশগ্ৰহণ কৰে মুখ্যমন্ত্ৰী হিমন্ত বিশ্ব শৰ্মাই।
অনুষ্ঠানত ৰাজ্যৰ বৰ্ণিল সংস্কৃতি দেশৰ দক্ষিণ আৰু পূব সীমান্তৰ চুবুৰীয়া ৰাষ্ট্ৰসমূহৰ প্ৰতিনিধিসকলৰ উপস্থিতিত প্ৰদৰ্শন কৰা হয়।
নৈশভোজনত অংশগ্ৰহণ কৰি মুখ্যমন্ত্ৰীয়ে কয়, “এই গুৰুত্বপূৰ্ণ কনক্লেভ আয়োজনৰ সুবিধা প্ৰদান কৰাৰ বাবে মই প্ৰতিনিধিবৃন্দক আন্তৰিক কৃতজ্ঞতা জ্ঞাপন কৰিছোঁ। মই দৃঢ় বিশ্বাসী যে অসম ভাৰতৰ এক্ট ইষ্ট নীতিৰ মূল অভিকেন্দ্ৰ হিচাপে বিবেচিত হৈ ভাৰতৰ অৰ্থনৈতিক বিকাশ আৰু কূটনৈতিক সম্পৰ্কত গুৰুত্বপূৰ্ণ ভূমিকা গ্ৰহণ কৰিব।”
উল্লেখযোগ্য যে উক্ত অনুষ্ঠানত কেন্দ্ৰীয় ৰাজ্যিক মন্ত্ৰী ভানুপ্ৰতাপ সিং বাৰ্মা, ৰাজ্য চৰকাৰৰ কেইবাগৰাকীও মন্ত্ৰী আৰু ভালেকেইগৰাকী জ্যেষ্ঠ বিষয়াও উপস্থিত থাকে।
