ধর্মীয় বিদ্বেষমূলক মন্তব্য সন্দৰ্ভত এইবাৰ সক্রিয় হৈছে দিল্লী আৰক্ষী। বহিষ্কৃত বিজেপি নেত্ৰী নূপুৰ শর্মা আৰু নবীন জিন্দালৰ লগতে সাংবাদিক চাবা আকভি, সংখ্যালঘু নেতা চাদাব চৌহান, ধর্মীয় নেতা মৌলানা মুফতি নাদিমৰ বিৰুদ্ধে দাখিল কৰা হৈছে এফআইআৰ।
দিল্লী আৰক্ষীৰ স্পেচিয়েল চেলেৰ ‘ইন্টেলিজেন্স ফিউচন এন্ড ষ্ট্ৰেটেজিক অপাৰেচন (আইএফএছঅ’) ইউনিট’ৰ ডেপুটি কমিছনাৰ কেপিএছ মালহোত্রাই জনোৱা মতে, পয়গম্বৰ হজৰত মহম্মদ সম্পর্কে বিতর্কিত মন্তব্যৰ বাবে নূপুৰৰ বিৰুদ্ধে এখন এফআইআৰ দাখিল কৰা হৈছে। দ্বিতীয় এফআইআৰত নাম আছে নবীন, চাবাসহ আঠজনৰ। হিন্দু মহাসভাৰ মুখপাত্র পূজা শাকুন পাণ্ডেও আছে উক্ত তালিকাত। নেট মাধ্যমত ধর্মীয় বিদ্বেষ বিয়পোৱাৰ অভিযোগত অনিল কুমাৰ মীনা, গুলজাৰ আনচাৰি, আব্দুৰ ৰহমানৰ নামতো দাখিল হৈছে এফআইআৰ।
উল্লেখ্য, পয়গম্বৰ সম্পর্কে বিতর্কিত মন্তব্যৰ বাবে ৰাষ্ট্ৰীয় মুখপাত্র নূপুৰ আৰু দিল্লীৰ নেতা নবীনক বহিষ্কাৰ কৰিছে বিজেপিয়ে। কিন্তু উক্ত শাস্তিৰ প্রতিবাদত ইতিমধ্যে নেট মাধ্যমত প্রচাৰত নামি পৰিছে বিজেপি সমর্থকসকলৰ একাংশ। ট্রেন্ডিং হৈছে ‘নূপুৰ নবীন কো ৱাপছ লো’ প্রচাৰ।
বিজেপি সমর্থক বহুতেই টুইটাৰত দলৰ বিৰুদ্ধে ক্ষোভ উজাৰিছে। দলৰ শীর্ষ নেতৃত্ব কিয় নূপুৰ-নবীনৰ কাষত নাই, তাকে লৈও প্রশ্ন তুলিছে। কিন্তু কেন্দ্রীয় গৃহমন্ত্রী অমিত শ্বাহৰ মন্ত্রালয়ৰ দ্বাৰা নিয়ন্ত্রিত দিল্লী আৰক্ষীৰ পদক্ষেপত স্পষ্ট যে আন্তর্জাতিক মঞ্চৰ হেঁচাত পৰা নৰেন্দ্র মোদী চৰকাৰে সম্প্ৰতি ঘৃণামূলক ভাষণ বিতর্কত ‘কঠোৰ অৱস্থান’ বজায় ৰাখিব বিচাৰিছে।
