পাৰভেজ মুশাৰফৰ মৃত্যু হৈছে নেকি? পাকিস্তানৰ প্রাক্তন সেনাপ্ৰধান পাৰভেজ মুশাৰফৰ শাৰীৰিক অৱস্থাক লৈ এতিয়া জল্পনা তুঙ্গত। বহু দিন ধৰি অসুস্থ হৈ আছে তেওঁ। শুক্রবাৰে শাৰীৰিক অৱস্থাৰ অধিক অৱনতি ঘটাত তেওঁক ভেন্টিলেটৰত ৰখা হয়। সংবাদ মাধ্যমৰ একাংশত মুশাৰফৰ মৃত্যুৰ খবৰ বিয়পি পৰিছে।
অৱশ্যে সেই খবৰৰ সত্যতা স্বীকাৰ কৰা নাই পাক প্রশাসনে। আনকি পাকিস্তানৰ প্রাক্তন ক্রিকেটাৰসকলৰো দাবী, এই খবৰ সঁচা নহয়। উল্লেখযোগ্য যে, বহু দিন ধৰি ডুবাইৰ এখন মার্কিন হস্পিটেলত চিকিৎসাধীন হৈ আছে মুশাৰফ। কিন্তু শুক্রবাৰে তেওঁৰ শাৰীৰিক অৱস্থাৰ অধিক অৱনতি ঘটাত তেওঁক ভেন্টিলেটৰত ৰখা হয়।
শেহতীয়া খবৰ মতে, ডুবাইলৈ ৰাওনা হৈছে মুশাৰফৰ পৰিয়ালৰ লোক।
উল্লেখ্য, ১৯৯৯ চনত নৱাজ শ্বৰিফ চৰকাৰৰ বিৰুদ্ধে সামৰিক অভ্যুত্থান ঘটাই ক্ষমতা দখল কৰিছিল পাক সেনাৰ তৎকালীন প্রধান মুশাৰফে। ২০০৮ পর্যন্ত ক্ষমতাত আছিল তেওঁ। ১৯৪৩ চনত মুশাৰফৰ জন্ম দিল্লীত। কৰাচী আৰু তুৰস্কৰ ইস্তানবুলত শৈশৱ কাটে প্রাক্তন পাক ৰাষ্ট্ৰপতিগৰাকীৰ।
লাহোৰৰ ফৰমান ক্রিশ্চিয়ান কলেজৰ পৰা মুশাৰফে গণিত বিষয় লৈ নামভর্তি কৰিলেও পৰিয়ালৰ অমতত পাকিস্তান মিলিটাৰী একাডেমিত যোগ দিয়ে ১৯৬১ চনত। ১৯৬৫ চনৰ পাক–ভাৰত যুদ্ধত অংশগ্রহণ কৰে তেওঁ। নব্বৈৰ দশকত মেজৰ জেনেৰেল মুশাৰফ এটি পদাতিক বাহিনীৰ অধিনায়কত্ব আৰু পাকিস্তান সেনাবাহিনীৰ কমান্ডো বাহিনী ‘স্পেচিয়েল ছার্ভিচেছ গ্রুপ’ৰ প্রধান হয়।
তেওঁ পিছত সেনাবাহিনীৰ সদর কাৰ্যালয়ত উপ সেনা সচিব আৰু ডাইৰেক্টৰ জেনেৰেল অব মিলিটাৰী অপাৰেচন্স ডাইৰেক্টৰেট আছিল। ১৯৯৮ চনৰ অক্টোবৰ মাহত পাৰভেজ মুশাৰফৰ পদবী লেফটেনেন্ট–জেনেৰেলৰ পৰা পূর্ণ জেনেৰেল পদবীলৈ উন্নীত কৰে তৎকালীন প্রধানমন্ত্রী নৱাজ শ্বৰিফে। পূর্ণ জেনেৰেল হিচাবে পাৰভেজ সেনাবাহিনী প্রধান আৰু চেয়াৰমেন অব দ্য জয়েন্ট চিফছ অব ষ্টাফ কমিটিৰ দায়িত্ব পাইছিল।
১৯৯৮ চনত মুশাৰফক পাক সেনাৰ প্রধান পদত বহুৱায় তৎকালীন প্রধানমন্ত্রী নৱাজ শ্বৰিফে। সেনাপ্রধান হিচাবে ১৯৯৯ চনত ভাৰত আক্ৰমণৰ মূল পৰিকল্পনা তেওঁৰেই আছিল। পিছত নৱাজ শ্বৰিফক আঁতৰাই ক্ষমতা দখল কৰে কার্গিল যুদ্ধৰ কাৰিকৰ মুশাৰফ। শ্বৰিফক গৃহবন্দী কৰি ৰাৱালপিন্ডিৰ কেন্দ্ৰীয় কাৰাগাৰত ৰখা হয়। কিন্তু তাৰ পিছত পৰিস্থিতি ওলোটা হ’বলৈ আৰম্ভ কৰে।
২০০৭ চনত দেশৰ বিৰুদ্ধে ষড়যন্ত্রমূলক কার্যকলাপ আৰু বেআইনীভাবে জৰুৰী অৱস্থা প্ৰৱৰ্তন কৰাক লৈ ২০১৩ চনত মুশাৰফৰ বিৰুদ্ধে গোচৰ ৰুজু কৰে তৎকালীন নৱাজ শ্বৰিফ চৰকাৰে। তেওঁৰ বিৰুদ্ধে দেশ আৰু চৰকাৰৰ বিৰুদ্ধে ষড়যন্ত্রৰ অভিযোগ অনা হয়। শুনানিৰ শেষত ২০১৪ চনৰ মার্চ মাহত তেওঁক দোষী সাব্যস্ত কৰি মৃত্যুদণ্ড দিয়া হয়। অৱশ্যে উক্ত শাস্তি পিছত মাফ কৰি দিয়া হয়। এই পৰিস্থিতিতে ২০১৬ চনত দেশ এৰে প্রাক্তন পাক সেনাপ্রধানজনে।
