ৰাজধানী ঢাকাকে ধৰি বাংলাদেশৰ বিভিন্ন প্ৰান্তত সুকলমে উদযাপন কৰা হয় ৰথযাত্ৰা উৎসৱ (Rath Yatra)। ঢাকাৰ ইস্কনৰ স্বামীবাগ আশ্ৰমত দেখা গ’ল জনসমাগম। জগন্নাথ, বলোৰাম আৰু সুভদ্ৰাৰ ৰথৰ ৰছী স্পৰ্শ কৰিবলৈ তাত হাজাৰ হাজাৰ ভক্ত আৰু দৰ্শনাৰ্থী উপস্থিত হয়।
বৃহস্পতিবাৰে বিয়লি ৩.৩০ বজাত (স্থানীয় সময় অনুসৰি) স্বামীবাগৰ ইস্কনৰ কেন্দ্ৰীয় কাৰ্যালয় আৰু মূল মন্দিৰৰ পৰা আৰম্ভ হয় জগন্নাথ, বলোৰাম আৰু সুভদ্ৰাৰ ৰথযাত্ৰা। বিডি নিউজত প্ৰকাশিত খবৰ অনুসৰি, এই শোভাযাত্ৰা জয়কালী মন্দিৰৰ মাজেৰে পাৰ হৈ চপলা চত্তৰত উপস্থিত হয়।
ইয়াৰ পিছত পল্টন ম’ৰে, সচিবালয় মেট্ৰ’ ষ্টেচন, নেশ্যনেল প্ৰেছ ক্লাব, হাইকোৰ্ট, ড’ৱেল চত্তৰ, শ্বাহিদ মিনাৰ আৰু প্লাছিৰ ম’ৰে হৈ ঢাকেশ্বৰী ৰাষ্ট্ৰীয় মন্দিৰত শেষ হয়। হৰিনাম সংকীৰ্ত্তন কৰা হয় আৰু বিশ্ব শান্তি আৰু সমৃদ্ধিৰ বাবে ‘অগ্নিহোত্ৰ যজ্ঞ’ কৰা হয়। ৰথৰ পৰা ভক্তসকলক প্ৰসাদো বিতৰণ কৰা হয়।
আয়োজকসকলে জনোৱা মতে, ২৪ জুলাইৰ (শুকুৰবাৰ) পৰা আৰম্ভ হ’ব উলটাৰথ যাত্ৰা। উলতাৰথ যাত্ৰা ঢাকেশ্বৰী মন্দিৰৰ পৰা ইস্কনৰ স্বামীবাগ আশ্ৰমলৈ একেটা পথতে সমাপ্ত হ’ব। ২০২৪ চনৰ ৫ আগষ্টত গণ প্ৰতিবাদৰ বাবে বাংলাদেশৰ শ্বেখ হাছিনা চৰকাৰৰ পতন ঘটিছিল।
তাৰ পিছৰে পৰা তাত সংখ্যালঘু বিশেষকৈ হিন্দুৰ ওপৰত অত্যাচাৰ বৃদ্ধি পোৱাৰ অভিযোগ উত্থাপন হৈছে। মহম্মদ ইউনুছৰ নেতৃত্বত পূৰ্বৰ অন্তৱৰ্তীকালীন চৰকাৰৰ দিনত ইছলাম ধৰ্মক অপমান কৰাৰ অভিযোগত হিন্দুক আক্ৰমণ কৰাৰ লগতে আনকি দীপু দাসকে ধৰি কেইবাজনো লোকক হত্যা কৰাৰ অভিযোগ উত্থাপন হৈছিল।
ইস্কনৰ চট্টগং সংমণ্ডলৰ প্ৰাক্তন সম্পাদক সন্ন্যাসী চিন্ময়কৃষ্ণ দাসক ৰাষ্ট্ৰীয় পতাকাক অপমান কৰা আৰু দেশদ্ৰোহৰ অভিযোগত গ্ৰেপ্তাৰ কৰা হয়। কিন্তু নতুন প্ৰধানমন্ত্ৰী তাৰিক ৰহমানৰ অধীনত বাংলাদেশত শান্তিপূৰ্ণভাৱে উদযাপন কৰা হয় ৰথযাত্ৰা।
