একনাথ শিণ্ডে মহাৰাষ্ট্ৰৰ নতুন মুখ্যমন্ত্ৰী হিচাপে শপত গ্ৰহণ কৰাৰ এসপ্তাহ হ’ল। এইবাৰ শিণ্ডে-বিজেপি চৰকাৰৰ কেবিনেট নজৰত আছে। সৰ্বভাৰতীয় সংবাদ মাধ্যমৰ এক সূত্ৰ অনুসৰি নতুন চৰকাৰত বিজেপিৰ ২৫ গৰাকী মন্ত্ৰীক মন্ত্ৰী বনাব পাৰে। শিণ্ডে শিবিৰৰ পৰা ১৩ জন মন্ত্ৰী থকাৰ লগতে বাকী সদস্যসকল নিৰ্দলীয় হ’ব।
নৱাগত অধিকাংশই শিণ্ডে-বিজেপি চৰকাৰৰ কেবিনেটত লোৱা হ’ব। এক সূত্ৰই দাবী কৰিছে যে মহাৰাষ্ট্ৰ নিৰ্বাচনৰ পূৰ্বে মন্ত্ৰীসভাত নতুন মুখৰ পৰীক্ষা কৰা হ’ব। ১১ জুলাইত উচ্চতম ন্যায়ালয়ৰ ৰায়দানৰ পিছতে কেবিনেট সন্দৰ্ভত চূড়ান্ত সিদ্ধান্ত গ্ৰহণ কৰা হ’ব। সেইদিনা শিণ্ডেকে ধৰি ১৬ জন বিদ্ৰোহীৰ বিধায়ক পদ বাতিল কৰাৰ গোচৰৰ শুনানিও হ’ব ৷
মন কৰিবলগীয়া যে বিজেপিৰ সৈতে হাত মিলাই মহাৰাষ্ট্ৰত শিণ্ডে চৰকাৰ গঠন কৰা হৈছে। উপ-মুখ্যমন্ত্ৰী হিচাপে শপত গ্ৰহণ কৰিছে দেৱেন্দ্ৰ ফডনবীছে। যোৱা সোমবাৰে হোৱা আস্থা ভোটত শিণ্ডে-বিজেপি চৰকাৰে বিপুল ব্যৱধানত জয়লাভ কৰে।
