ধাৰাসাৰ বৰষুণৰ ফলত পুনৰ বানপানীৰ সৃষ্টি হয় বেংগালুৰু চহৰত। বুধবাৰে সন্ধিয়া ৭.৩০ বজাৰ পৰা আৰম্ভ হোৱা ধাৰাসাৰ বৰষুণৰ ফলত বেলন্দুৰৰ আই টি জোনকে ধৰি বেংগালুৰু চহৰৰ পূব, দক্ষিণ আৰু মাজমজিয়াৰ কেইবাটাও গুৰুত্বপূৰ্ণ পথ প্লাৱিত হয়।
বতৰ বিজ্ঞান বিভাগৰ সূত্ৰ অনুসৰি, বুধবাৰে মহানগৰীৰ উত্তৰ দিশত ৫৯ মিলিমিটাৰ বৰষুণ হয়। ইতিমধ্যে বতৰ বিজ্ঞান কাৰ্যালয়ে হালধীয়া সতৰ্কবাণী জাৰি কৰিছে, প্ৰচণ্ড বৰষুণৰ ভৱিষ্যদ্বাণী কৰা হৈছে। বৃহস্পতিবাৰৰ পৰা আৰম্ভ কৰি অহা তিনিদিনলৈ বেংগালুৰু চহৰত ধাৰাসাৰ বৰষুণ হʼব বুলিও বতৰ বিজ্ঞানীসকলে জানিবলৈ দিছে৷
বেংগালুৰুৰ বান পৰিস্থিতিৰ ছবি বিভিন্ন ছচিয়েল মিডিয়াত বিয়পি পৰিছে। সেই ভিডিঅʼবোৰত মহানগৰীৰ নিম্ন অঞ্চলৰ ৰাস্তা-ঘাট প্লাৱিত হৈছে। সৃষ্টি হৈছে যান-জঁটৰ। খোলা মেনহোলৰ কাষেৰে পানী বৈ গৈছে।
উল্লেখ্য, যোৱা মাহতো একেৰাহে তিনিদিন বৰষুণৰ ফলত বেংগালুৰুত আকস্মিক বানপানীৰ সৃষ্টি হৈছিল। সেই বানপানীত নগৰৰ কেইবাটাও অংশ পানীৰ তলত ডুব গৈছিল। কেইবাটাও আই টি হাব আৰু আৱাসিক এলেকাও পানীৰ তলত ডুব গৈছিল। বহু লোক আবদ্ধ হৈ পৰিছিল ঘৰতে। পথসমূহত যান-জঁটৰ লগতে বিমান পৰিবহণতো বাধাৰ সৃষ্টি হয়।
আৰু তিনিদিনৰ প্ৰচণ্ড বৰষুণৰ পূৰ্বাভাসে পুনৰ একেধৰণৰ পৰিস্থিতিৰ সৃষ্টি কৰিব পাৰে তাক লৈ বেংগালুৰুৰ বাসিন্দাসকল আশংকাত পৰিছে।
