নতুন ইতিহাসৰ দিশে ব্ৰিটেইন! সকলো ঠিকে থাকিলে দেশখনৰ প্ৰধানমন্ত্ৰীৰ চকীত বহিবলৈ গৈ আছে ভাৰতীয় মূলৰ ঋষি চুনক। ঋষিৰ ভাগ্য যদি উদয় হয় তেন্তে তেওঁ হʼব প্ৰথম ভাৰতীয় মূলৰ লোক যিয়ে ব্ৰিটিছ প্ৰধানমন্ত্ৰীৰ পদৰ শোভাবৰ্ধন কৰিব।
প্ৰধানমন্ত্ৰী হিচাপে শপত গ্ৰহণ কৰি ৪৫ দিনৰ পিছত লিজ ট্ৰাছে পদত্যাগ কৰাৰ পিছত পুনৰ চৰ্চালৈ আহিছে ঋষিৰ নাম। ঋষিৰ লগত প্ৰাক্তন প্ৰধানমন্ত্ৰী বৰিছ জনছন আৰু প্ৰাক্তন প্ৰতিৰক্ষা সচিব পেনি মৰ্ডাণ্টে পৰৱৰ্তী প্ৰধানমন্ত্ৰী আৰু কনজাৰ্ভেটিভ পাৰ্টিৰ নেতা হোৱাৰ দৌৰত অংশগ্ৰহণ কৰে।
কিন্তু জনছন সেই দৌৰৰ পৰা বাহিৰ ওলাই আহে। প্ৰধানমন্ত্ৰী হʼবলৈ হʼলে কনজাৰ্ভেটিভ পাৰ্টিক ১০০ জন সাংসদৰ সমৰ্থনৰ প্ৰয়োজন। সূত্ৰ অনুসৰি, ব্ৰিটিছ সংসদৰ ১৪২ জন সাংসদে ঋষিক সমৰ্থন কৰিছে। ২৯ জন সাংসদে মৰ্ডান্তক সমৰ্থন কৰে। সোমবাৰে স্থানীয় সময় অনুসৰি বিয়লি ২ বজাৰ পূৰ্বে যদি মৰ্ডাণ্টে ১০০ জন টোৰী সাংসদৰ সমৰ্থন নাপায় তেন্তে ঋষিৰ জয় নিশ্চিত।
বৰিছ জনছনৰ পদত্যাগৰ পিছত ব্ৰিটেইনৰ প্ৰাক্তন বিত্তমন্ত্ৰী ঋষিয়ে পৰৱৰ্তী প্ৰধানমন্ত্ৰী হোৱাৰ দৌৰত যোগদান কৰে। কিন্তু সেইবাৰ তেওঁ চূড়ান্ত পৰ্যায়ত লিজ ট্ৰাছৰ হাতত পৰাস্ত হয়। সেই পৰাজয়ৰ কিছুদিনৰ ভিতৰতে ঋষিয়ে পুনৰ ব্ৰিটেইনৰ প্ৰধানমন্ত্ৰীৰ আসনত বহিবলৈ দৌৰত যোগদান কৰে।
ভাৰতীয় মূলৰ ঋষি ব্ৰিটিছ ৰাজনীতিত কেইবাবছৰ ধৰি চৰ্চাত আছে। ইনফোছিছৰ সহ-প্ৰতিষ্ঠাপক নাৰায়ণ মূৰ্তিৰ জোঁৱাইক লৈও তীব্ৰ বিতৰ্কৰ সৃষ্টি হৈছে। যিসকল লোক ব্ৰিটেইনৰ বাহিৰত বাস কৰে কিন্তু দখলৰ বাবে ব্ৰিটেইনত আছে তেওঁলোকে দেশখনৰ চৰকাৰক বিশেষ কৰ দিব লাগে। ঋষিৰ পত্নী অক্ষতাৰ বিৰুদ্ধে বিশেষ প্ৰভাৱৰ দ্বাৰা কৰ ফাঁকিৰ অভিযোগ উত্থাপন হৈছিল।
মস্কোৱে কিয়েভ আক্ৰমণ কৰাৰ পিছত ৰাছিয়াৰ পৰা ৰাজহ লাভ কৰা ব্যৱসায়ৰ ওপৰত প্ৰশ্ন উত্থাপন হৈছিল। ব্ৰিটেইনৰ আগশাৰীৰ ৰাজনীতিবিদ হোৱাৰ বাবে এই অভিযোগসমূহ স্বাভাৱিকতে ঋষিক লক্ষ্য কৰি লোৱা হৈছিল। কিন্তু পৰৱৰ্তী সময়ত ঋষিয়ে এই অভিযোগ অস্বীকাৰ কৰে। বিতৰ্ক হʼলেও তেওঁ বিশেষ গুৰুত্ব নিদিলে।
তেওঁৰ পৰিয়ালটো চাউথমপটনত বাস কৰিছিল। ১৯৮০ চনৰ ১২ মেʼত তাতেই ঋষিৰ জন্ম হয়। তেওঁ এটা আফ্ৰিকান হিন্দু পাঞ্জাবী পৰিয়ালত ডাঙৰ-দীঘল হয়। হেম্পশ্বায়াৰ আৰু ৱিনচেষ্টাৰ কলেজত স্কুলীয়া শিক্ষা গ্ৰহণ কৰাৰ পিছত ২০০১ চনত অক্সফ’ৰ্ডৰ লিংকন কলেজৰ পৰা স্নাতক ডিগ্ৰী লাভ কৰে।
পিছলৈ ২০০৬ চনত ঋষিয়ে কেলিফৰ্ণিয়াৰ ষ্টেনফৰ্ড বিশ্ববিদ্যালয়ত এম বি এ অধ্যয়ন কৰে। তাতেই তেওঁৰ পত্নী অক্ষতা মূৰ্তিক লগ পাইছিল। ২০০৯ চনত বেঙ্গালুৰুত অক্ষতাৰ সৈতে বিবাহপাশত আবদ্ধ হয় ঋষি। ২০১৪ চনত ৰাজনীতিত প্ৰৱেশ কৰিছিল ঋষিয়ে। সেই বছৰত তেওঁ ৰিচমণ্ডৰ পৰা কনজাৰ্ভেটিভ পাৰ্টিৰ বাবে ব্ৰিটিছ সংসদৰ সদস্য হিচাপে নিৰ্বাচিত হৈছিল।
ব্ৰিটেইনৰ অন্যতম ধনী ব্যক্তি ঋষি। তেওঁৰ সম্পত্তিৰ পৰিমাণ জানিলে চকু কপালত উঠিব! সংবাদ সংস্থাৰ সূত্ৰ অনুসৰি, ঋষি আৰু তেওঁৰ পত্নী অক্ষতাৰ মুঠ সম্পত্তি প্ৰায় ৭৩ কোটি পাউণ্ড। ভাৰতীয় মুদ্ৰাত যিটো ৬ হাজাৰ ৮০০ কোটিতকৈ অধিক।
লণ্ডনৰ মাজমজিয়াত ঋষিৰ এটা বিলাসী ঘৰ আছে। ঘৰটোত বহুতো সুবিধা আছে। জানিব পৰা মতে, ঋষিৰ ঘৰত পাঁচটা শোৱনি কোঠা আছে। লগতে চাৰিটা বাথৰুম আছে। তাত এখন বিশাল বাগানো আছে।
ঋষিৰ এই বিলাসী ঘৰৰ দামো আকাশলংঘী। ঋষি-অক্ষতাই প্ৰায় ৪২ কোটি টকা মূল্যত ক্ৰয় কৰে ঘৰটো। বৰ্তমান এই ঘৰৰ দাম ৬৫ কোটি টকাৰো অধিক। ঋষিৰ ঘৰ ব্ৰিটিছ প্ৰধানমন্ত্ৰীৰ ঘৰৰ ওচৰতে। ২০২২ চনৰ এপ্ৰিল মাহত নতুনকৈ সজাই তোলা হৈছিল ঘৰটো। শুনা যায় যে ঋষিৰ ঘৰটো পত্নীৰ মন অনুযায়ী সজোৱা হৈছে ।
লণ্ডনৰ অল্ড ব্ৰম্পটন ৰোডৰ চাউথ কেনচিংটনতো ঋষিৰ এটা ঘৰ আছে। বন্ধু-বান্ধৱীৰ সৈতে ছুটী কটাবলৈ ঋষি আৰু অক্ষতা এই ঘৰলৈ যায়। উত্তৰ য়ৰ্কশ্বাৰতো ঋষিৰ ফাৰ্ম হাউছ আছে। এই ঘৰটোও বৰ বিলাসী।
