দলৰ আহ্বায়ক অৰবিন্দ কেজৰিৱালে জনসাধাৰণৰ মতামত প্ৰশ্ন কৰে যে ৰাজ্যৰ জনসাধাৰণে গুজৰাটত কোনজন আম আদমি পাৰ্টীৰ নেতাক মুখ্যমন্ত্ৰী হিচাপে চাব বিচাৰে। ৪ নৱেম্বৰত গম পাব জনসাধাৰণৰ উত্তৰ। নিজৰ সিদ্ধান্তৰ আঁৰৰ কাৰণ ব্যাখ্যা কৰি কেজৰিৱালে কয় যে মই বিচাৰো গুজৰাটৰ জনসাধাৰণে গুজৰাটৰ মুখ্যমন্ত্ৰী কোন হʼব সেইটো নিৰ্ণয় কৰক।
শুকুৰবাৰৰ পৰা তিনিদিনীয়াকৈ গুজৰাট ভ্ৰমণ আৰম্ভ কৰে। শনিবাৰে পুৱা আহমেদাবাদত এখন সংবাদমেল সম্বোধন কৰি কেজৰিৱালে ৰাজ্যবাসীক গুজৰাটৰ বাবে আপৰ মুখ্যমন্ত্ৰী পদৰ প্ৰাৰ্থী বাছনি কৰিবলৈ আগবাঢ়ি আহিবলৈ আহ্বান জনায়।
তেওঁ কয়, এটা ফোন নম্বৰ আৰু ই-মেইল আইডি দলটোৱে মুকলি কৰিছে। যʼত ৩ নৱেম্বৰৰ সন্ধিয়া ৫ বজালৈকে ৰাজ্যৰ জনসাধাৰণে মুখ্যমন্ত্ৰী হিচাপে কাক চাব বিচাৰে সেই সন্দৰ্ভত নিজৰ মতামত প্ৰকাশ কৰিব পাৰিব। ইয়াৰ ফলাফল ৪ নৱেম্বৰত জানিব পৰা যাব। এই সিদ্ধান্তৰ ব্যাখ্যা কৰি কেজৰিৱালে কয়, “মই বিচাৰো যে ৰাজ্যৰ জনসাধাৰণে নিজৰ মুখ্যমন্ত্ৰী বাছি লওক।”
পাঁচ বছৰ পূৰ্বে নিৰ্বাচনৰ পিছত বিজয় ৰূপানী ৰাজ্যৰ মুখ্যমন্ত্ৰী হৈছিল। নিৰ্বাচনৰ এবছৰ পূৰ্বে ৰূপাণীক অপসাৰণ কৰাৰ পিছতে হঠাতে ভূপেন্দ্ৰ পেটেলক মুখ্যমন্ত্ৰী হিচাপে নিযুক্তি দিয়াৰ অভিযোগ আপৰ শীৰ্ষ নেতাৰ। সেই সিদ্ধান্ত বিজেপিৰ কেন্দ্ৰীয় নেতৃত্বই লৈছিল। কেজৰিৱালৰ প্ৰশ্ন, “মই জানিব বিচাৰিছো, সেই সিদ্ধান্ত লোৱাৰ পূৰ্বে ৰাজ্যৰ জনসাধাৰণৰ মতামত লোৱা হৈছিল নেকি?”
ইয়াৰ পূৰ্বে কেজৰিৱালৰ দলে পঞ্জাবতো একেদৰে মুখ্যমন্ত্ৰীক বাছি লৈছিল। আপ নেতৃত্বই দাবী কৰে যে সেই সময়ত পঞ্জাবৰ জনসাধাৰণে ভগৱন্ত মানক মুখ্যমন্ত্ৰী হিচাপে চাব বিচাৰিছিল। পৰৱৰ্তী সময়ত পঞ্জাবৰ মুখ্যমন্ত্ৰী হিচাপে শপত গ্ৰহণ কৰে ভগৱন্তে। এই ক্ষেত্ৰতো দলটোৱে সেই সমীকৰণ অনুসৰি আগবাঢ়ি যোৱাৰ সিদ্ধান্ত লৈছে।
অৱশ্যে বিজেপিয়ে অভিযোগ কৰিছে যে সমগ্ৰ বিষয়টো এটা শ্বো-অফ। কেজৰিৱালৰ মতে, আপ সমৰ্থকে তেওঁৰ পছন্দৰ প্ৰাৰ্থী ভগৱন্ত মানক ভোট দিছিল। যাতে কেজৰিৱালে নিজৰ পছন্দৰ ব্যক্তিজনক পঞ্জাবৰ মুখ্যমন্ত্ৰী হিচাপে নিযুক্তি দিব পাৰে। অৱশ্যে কেজৰিৱালে এই অভিযোগ খাৰিজ কৰে। তেওঁৰ ভাষাত, “পঞ্জাবৰ জনসাধাৰণে নিজৰ মুখ্যমন্ত্ৰীক বাছি লৈছিল। দলটোৱে একো জাপি দিয়া নাই।”
একে সময়তে শনিবাৰে দিয়া ভাষণত কেজৰিৱালে গুজৰাটৰ বিজেপি চৰকাৰক তীব্ৰ সমালোচনা কৰি কয়, “সমগ্ৰ দেশৰ দৰে গুজৰাটৰ জনসাধাৰণো মুদ্ৰাস্ফীতি আৰু মূল্যবৃদ্ধিৰ বাবে ক্ষুব্ধ হৈ পৰিছে। নিবনুৱাৰ সংখ্যা বেছি। মানুহৰ হাতত টকা নাই। এই পৰিস্থিতিত গুজৰাটৰ মানুহে নতুন বিকল্প বিচাৰিছে। আম আদমি পাৰ্টি বিকল্প।”
লগতে কেজৰিৱালে পুনৰবাৰ গুজৰাটৰ জনসাধাৰণক বিনামূলীয়া বিদ্যুৎ, শিক্ষা আৰু স্বাস্থ্য সেৱাৰ প্ৰতিশ্ৰুতি দিছে।
ইয়াৰ উপৰি তেওঁ আশ্বাস দিয়ে যে আপ ক্ষমতালৈ আহিলে পাটিদাৰ, কৃষক, দলিত আৰু অন্যান্য চৰকাৰ বিৰোধী আন্দোলনৰ বিৰুদ্ধে সকলো গোচৰ প্ৰত্যাহাৰ কৰা হʼব। শনিবাৰে কেজৰিৱালৰ গাড়ীৰ শোভাযাত্ৰা গুজৰাটৰ নৱছাৰীত উপস্থিত হোৱাৰ সময়ত স্থানীয় ৰাইজে তেওঁক কʼলা পতাকা দেখুৱাইছিল। ‘চোৰ-চোৰ’ শ্লোগান দিয়া বুলিও অভিযোগ উত্থাপন হৈছে।
পিছত কেজৰিৱালে এটা টুইটযোগে কয়, “আপোনালোকে যিমানেই প্ৰতিবাদ নকৰক কিয়, মই প্ৰতিশ্ৰুতি দিছো, গুজৰাটত মই ক্ষমতালৈ আহিলে মই লʼৰা-ছোৱালীৰ বাবে এখন স্কুল সাজিম, যদি আপোনাৰ ঘৰত কোনোবা বেমাৰী হয়, মই তেওঁৰ চিকিৎসা কৰিম, যুৱক-যুৱতীসকলৰ বাবে উপাৰ্জনৰ ব্যৱস্থা কৰিব। এদিন মই আপোনালোকৰ হৃদয় জয় কৰি আপোনালোকৰ দলত যোগ দিম।”
