গুৱাহাটী স্মাৰ্ট চিটি প্ৰকল্পৰ (Guwahati Smart City Project) অংশ হিচাপে মহানগৰীত ৰূপায়ণ হৈ আছে বিভিন্ন উন্নয়নমূলক প্ৰকল্পৰ কাম। বিশেষকৈ গুৱাহাটীৰ ব্ৰহ্মপুত্ৰ পাৰৰ সৌন্দৰ্য (The beauty of the Brahmaputra bank in Guwahati) বৃদ্ধি আৰু উজানবজাৰৰ পৰা জালুকবাৰীলৈকে প্ৰায় ৬ কিলোমিটাৰজুৰি উন্নয়নমূলক আন্তঃগাঁথনি নিৰ্মাণৰ কাম চলি আছে।
আজি উক্ত নিৰ্মাণকাৰ্যৰ অগ্ৰগতিৰ বুজ ল’বলৈ নিৰ্মাণস্থলীত উপস্থিত হয় মুখ্যমন্ত্ৰী ডঃ হিমন্ত বিশ্ব শৰ্মা। তাৰেই অংশ হিচাপে ফাঁচীবজাৰ ব’টানিকেল গাৰ্ডেন পৰিদৰ্শন কৰি তাত বৰ্তমানে চলি থকা নিৰ্মাণকাৰ্যৰ সকলো দিশৰ বুজ লয়।
লগতে তেওঁ আশা ব্যক্ত কৰে যে আগন্তুক ছমাহৰ ভিতৰত প্ৰথম পৰ্যায়ৰ নিৰ্মাণকাৰ্য সম্পূৰ্ণ হৈ উঠিব।পৰিদৰ্শনকালত জি এম ডি এক এই নিৰ্মাণৰে জড়িত সকলো আনুষংগিক কাৰ্য সফলতাৰে ৰূপায়ণ কৰি এক আকৰ্ষণীয় ক্ষেত্ৰৰূপে গঢ় দিবলৈও মুখ্যমন্ত্ৰীয়ে নিৰ্দেশনা প্ৰদান কৰে।
আনহাতে, গুৱাহাটীক স্মাৰ্ট চিটী হিচাপে গঢ় দিয়াৰ ক্ষেত্ৰত ব্ৰহ্মপুত্ৰ নদীমুখ প্ৰকল্প ৰূপায়ণ অব্যাহত ৰাখিছে অসম চৰকাৰে। আজি ইয়াৰ অংশস্বৰূপে পাণবজাৰৰ নিৰ্মাণ ক্ষেত্ৰ পৰিদৰ্শন কৰি কাম-কাজৰ বুজ লৈ গুণগত মানসম্পন্ন নিৰ্মাণেৰে প্ৰকল্পটি সময়মতে সম্পূৰ্ণ কৰাৰ ক্ষেত্ৰত গুৰুত্ব প্ৰদান কৰে। তদুপৰি, কাৰ্যকৰী সংস্থাৰ সৈতে আলোচনা কৰি নিৰ্মাণ ক্ষেত্ৰৰ গোটেই দৃশ্যপটৰ এক সংহত সমতা বজাই ৰাখি আকৰ্ষণীয় ৰূপত গঢ় দিবলৈ নিৰ্দেশনা প্ৰদান কৰে মুখ্যমন্ত্ৰীয়ে।
পৰিদৰ্শনকালত মুখ্যমন্ত্ৰীৰ সৈতে অশোক সিংহল, গৃহ নিৰ্মাণ আৰু নগৰ পৰিক্ৰমা বিভাগৰ আয়ুক্ত সচিব কবিতা পদ্মনাভনকে ধৰি অন্যান্যসকল উপস্থিত থাকে।
