মাত্ৰ ৯ মাহতে কমিল ভোটৰ ব্যৱধান। ত্ৰিপুৰাৰ (Tripura) মুখ্যমন্ত্ৰী (CM) মাণিক সাহাই (Manik Shah) যোৱা বছৰৰ জুন মাহত টাউন বৰদোৱালী বিধানসভা সমষ্টিত কংগ্ৰেছৰ আশীষ সাহাক (Asish Shah) ৬১০৪টা ভোটত পৰাস্ত কৰিছিল। এইবাৰ আশীষৰ লগত তেওঁৰ ব্যৱধান হাজাৰতকৈও কমলৈ হ্ৰাস পালে।
টাউন বৰদোৱালী সমষ্টিত ৫০ শতাংশ ভোট লাভ কৰে মাণিকে। তেওঁৰ প্ৰতিদ্বন্দ্বী বাওঁপন্থী সমৰ্থিত কংগ্ৰেছ প্ৰাৰ্থী আশীষে প্ৰায় ৪৭ শতাংশ ভোট লাভ কৰে। তৃণমূলৰ (Trinamul) প্ৰাৰ্থীৰ দখল ডেৰ শতাংশতকৈ অলপ বেছি। বিৰোধীয়ে দাবী কৰিছে যে বিজেপিৰ ‘শক্তিশালী ভিত্তি’ হিচাপে পৰিচিত ৰাজধানী আগৰতলাৰ আসনত নামমাত্ৰ ব্যৱধানত মাণিক জয়ী হোৱাটো বিজেপিৰ সমৰ্থন হ্ৰাস পোৱাৰ লক্ষণ। উল্লেখ্য, ২০১৮ চনৰ বিধানসভা নিৰ্বাচনত টাউন বৰদোৱালী সমষ্টিত বিজেপিৰ প্ৰাৰ্থী হিচাপে জয়ী হৈছিল আশীষ। পিছত তেওঁ বিধায়ক পদৰ পৰা পদত্যাগ কৰি কংগ্ৰেছত যোগদান কৰে, যাৰ ফলত উপ-নিৰ্বাচন হয়।
টাউন বৰদোৱালী সমষ্টিত জুন মাহৰ উপ-নিৰ্বাচনত ১৭,১৮১ টা ভোট লাভ কৰে মাণিকে। তেওঁৰ প্ৰতিদ্বন্দ্বী, দুবাৰৰ বিধায়ক, কংগ্ৰেছ প্ৰাৰ্থী আশীষে ১১,০৭৭ টা ভোট লাভ কৰে। তৃণমূলৰ প্ৰাৰ্থী সংহিতা ভট্টাচাৰ্যই এই কেন্দ্ৰত মাত্ৰ ৯৮৬ টা ভোট লাভ কৰে।
আসনখনত বামফ্ৰন্টৰ ফৰৱাৰ্ড ব্লকৰ প্ৰাৰ্থীগৰাকীয়ে লাভ কৰে ৩,৩৭৬টা ভোট। এইবাৰ বাওঁপন্থীৰ সৈতে কংগ্ৰেছৰ মিত্ৰতাৰ বাবে সেই ভোট কংগ্ৰেছলৈ যায়। শাসকীয় শিবিৰৰ দাবী যে ইয়াৰ ফলত এই ব্যৱধান কমিছে।
বিগত বৰ্ষৰ মেʼ মাহত বিপ্লৱ দেৱে (Biplob Dev) হঠাৎ পদত্যাগ কৰাৰ ২৪ ঘণ্টাৰ ভিতৰতে বিজেপিয়ে ৰাজ্যসভাৰ সাংসদ মাণিক সাহাক ত্ৰিপুৰাৰ নতুন মুখ্যমন্ত্ৰী হিচাপে ঘোষণা কৰে। মুখ্যমন্ত্ৰীৰ আসনত থাকিবলৈ উপ-নিৰ্বাচনত জয়ী হʼবলগা হৈছিল। একালৰ কংগ্ৰেছ নেতা মাণিকে ২০১৬ চনত বিজেপিত যোগদান কৰিছিল। পেছাত দন্ত চিকিৎসক, ২০২০ চনত ত্ৰিপুৰা বিজেপিৰ ৰাজ্যিক সভাপতিও আছিল তেওঁ।
