বোকাখাত (Bokakhat)ত অগপ-ৰ (AGP) বৃহৎ কৰ্মকৰ্তা সন্মিলনেৰে আৰম্ভ কৰিলে আগন্তুক লোকসভা নিৰ্বাচন (Lok sabha Election)ৰ কুচকাৱাজ। আজি বোকাখাতত অনুষ্ঠিত হয় ১১নং কলিয়াবৰ লোকসভা সমষ্টিৰ অন্তৰ্গত ১০টা বিধানসভা সমষ্টিৰ অসম গণ পৰিষদৰ কৰ্মকৰ্তা সন্মিলন।
বোকাখাত নাট্য মন্দিৰত অনুষ্ঠিত সন্মিলনত আগন্তুক লোকসভা নিৰ্বাচনৰ প্ৰতি লক্ষ্য ৰাখি ১১ নং কলিয়াবৰ লোকসভা সমষ্টিৰ অন্তৰ্গত ১০টা বিধানসভা সমষ্টিৰ অসম গণ পৰিষদৰ সকলো কৰ্মকৰ্তা আৰু কেন্দ্ৰীয় সমিতিৰ বিষয় ববীয়াৰ লগতে অগপৰ সভাপতি অতুল বৰা, কাৰ্য্যকৰী সভাপতি কেশৱ মহন্ত আৰু অসম গণ পৰিষদৰ আটাইকেইজন বিধায়ক আজি উপস্থিত হয় বোকাখাতত।
এই সন্দৰ্ভত অগপ সভাপতি অতুল বৰাই সাংবাদিকৰ আগত কয় যে এই বছৰত অগপই প্ৰথমবাৰৰ বাবে লোকসভা কৰ্মী ভিত্তিক সন্মিলন আৰম্ভ কৰিছে। তেওঁ আৰু কয় যে অগপ মিত্ৰজোঁটৰ সৈতেই আছে। আগন্তুক নিৰ্বাচনত মিত্ৰজোঁটৰ সৈতে সমিলমিলেৰে অৱতীৰ্ণ হ’ব। মন্ত্ৰীগৰাকীয়ে কংগ্ৰেছ অসমৰ মাটিৰ পৰা সমূলঞ্চে উচন হ’ব বুলি উল্লেখ কৰি কয় যে ত্ৰিপুৰা,মনিপুৰ, নাগালেণ্ডৰ নিৰ্বাচনী ফলাফলৰ পাছত কংগ্ৰেছ সভাপতি মল্লিকাৰ্জুন খাৰ্গেৰ মন্তব্যই উত্তৰ পূৰ্বাঞ্চলৰ ৰাইজৰ মনত অত্যন্ত আঘাত দিছে আৰু ই অপমানসূচক। ইয়াৰ লগতে উত্তৰ পূৰ্বাঞ্চলত কংগ্ৰেছৰ ধিমিক ধামাককৈ জ্বলি থকা বন্তি গছীও নুমোৱাৰ ৰাষ্টা কংগ্ৰেছ সভাপতি গৰাকীয়ে নিজেই মুকলি কৰি দিলে বুলি মন্তব্য কৰে।
আনহাতে আজিৰ কৰ্মকৰ্তা সন্মিলনত উপস্থিত অগপ-ৰ কাৰ্যকৰী সভাপতি কেশৱ মহন্তই আজিৰ সন্মিলনত আগন্তুক নিৰ্বাচনৰ প্ৰস্তুতিৰ বাবে লোৱা কাৰ্যসূচী সন্দৰ্ভত আলোচনা হোৱাৰ কথা ব্যক্ত কৰে। মহন্তই লগতে স্পষ্ট কৰি দিয়ে যে আগন্তুক লোকসভাৰ নিৰ্বাচন মিত্ৰজোঁটৰ মজিয়াৰ পৰাই হ’ব। কলিয়াবৰ লোকসভাৰ সমষ্টিৰ পৰা আগন্তুক নিৰ্বাচনত প্ৰতিদ্বন্দিতা কৰাৰ সন্দৰ্ভত সিদ্ধান্ত মিত্ৰজোটৰ আলোচনা মৰ্মেই হ’ব বুলি কয় যদিও পূৰ্বৰে পৰা কলিয়াবৰত অগপ-ৰ প্ৰাৰ্থীয়ে নিৰ্বাচনত প্ৰতিদ্বন্দিতা কৰি আহিছে বুলিও মন্তব্য কৰে।
নিৰ্ভৰযোগ্য সূত্ৰ অনুসৰি অসম গণ পৰিষদৰ কাৰ্যকৰী সভাপতি কেশৱ মহন্তৰ ভাতৃ মনিমাধৱ মহন্তক পুনৰবাৰ কলিয়াবৰ লোকসভা সমষ্টিৰ অসম গণ পৰিষদৰ প্ৰাৰ্থী হিচাপে প্ৰক্ষেপ কৰাৰ সম্ভাৱনা আছে।
অগপৰ কেন্দ্ৰীয় সমিতিৰ উপ-সভাপতিসকল, সাধাৰণ সম্পাদকসকল, কলিয়াবৰ লোকসভা সমষ্টিৰ অন্তৰ্গত বিধানসভা সমষ্টিসমূহৰ সভাপতিসকল, সাধাৰণ সম্পাদকসকল, আঞ্চলিক সমিতিৰ বিষববীয়া প্ৰমুখ্যে অগপ আৰু ভাতৃ-ভগ্নী সংগঠনৰ বিষয়ববীয়াসকল, দলীয় কৰ্মকৰ্তাসকল আজিৰ সভাত উপস্থিত থাকে।
