বিবাহ পাশত আবদ্ধ হোৱাৰ পিছতেই এটি নতুন গীত লৈ আহিছে কণ্ঠশিল্পী ঋতৃষা শৰ্মা (Ritrisha Sarma)। “আকুল বিকুল কলিজা” শীৰ্ষক এটি নতুন গীতেৰে ঋতৃষা শৰ্মাই পুনৰ বাবে নিজ অনুৰাগীক বিহুৰ উপহাৰ দিছে। বহুকেইটা জনপ্ৰিয় গীতত কণ্ঠদান কৰা ঋতৃষা শৰ্মাৰ অনুৰাগীৰ শাৰী দীঘলীয়া। কিছুদিন পূৰ্বৰে পৰা বিভিন্ন নেতিবাচক সমালোচনাৰে ব্যতিব্যস্ত হৈ থাকিলেও কণ্ঠশিল্পী গৰাকীয়ে সদ্যমুক্তিপ্ৰাপ্ত গীতটিত যথেষ্ট সঁহাৰি লাভ কৰিবলৈ সক্ষম হৈছে।
উল্লেখ্য যে, “আকুল বিকুল কলিজা” শীৰ্ষক গীতটিৰ ভিডিঅ’ ত প্ৰিয়ম পল্লৱী, বংকিম শইকীয়া, নিতু খনিকৰ আৰু ঋতৃষা শৰ্মাই নিজেই অভিনয় কৰিছে। আনহাতে, গীতটিত কথা আৰু সুৰৰ দায়িত্বত আছে ৰমেন দানহ। সংগীত ব্যৱস্থাপনা কৰিছে প্ৰণয় দত্তই আৰু ভিডিঅ’ পৰিচালনাৰ দায়িত্বত আছে ভাস্বত ভূঞা। গীতটিৰ পোষ্টাৰ ডিজাইন কৰিছে ৰিতুপৰ্ণ বৰাই।
“ঝুনুকা”, “বুঢ়া তামোলৰে পাগ” ইত্যাদি অসমীয়া গীতেৰে বহুল সমাদৰ লাভ কৰা ঋতৃষা শৰ্মাৰ জনপ্ৰিয়তা কেৱল অসমতেই সীমাবদ্ধ নহয়। তেওঁ ৰাষ্ট্ৰীয় প্ৰেক্ষাপটতো সমানেই সমাদৃত। তেওঁৰ হিন্দী গীত সমূহে প্ৰায়ে ইউটিউবৰ ট্ৰেণ্ডিঙত থাকি শ্ৰোতা-দৰ্শকক আকৰ্ষণ কৰি আহিছে।
