ত্ৰিপুৰা (Tripura)ই বাঁহ (Use of Bamboo) ব্যৱহাৰ কৰি ‘গ্ৰীণ হাইড্ৰোজেন’ (Green Hydrogen) তৈয়াৰ কৰাৰ কথা ভাবিছে। ত্ৰিপুৰাৰ মুখ্যমন্ত্ৰী মাণিক সাহাই (Chief Minister Manik Saha) কয় যে তেওঁলোকে পৰিৱেশ ৰক্ষাৰ বাবে এই পদক্ষেপ লʼব বিচাৰে। আগৰতলাত আৰম্ভ হৈছে জি-২০ৰ বৈঠক। এই বৈঠক উপলক্ষে মাণিক সাহাৰ চৰকাৰে ত্ৰিপুৰাৰ নিজা হস্তশিল্প বিশ্বৰ আগত উপস্থাপন কৰিব বিচাৰিছে।
ৰাজ্যখনৰ বাঁহ আৰু বেতৰ হস্তশিল্পসমূহো আগৰতলাৰ হাপিয়ানাৰ আন্তঃৰাষ্ট্ৰীয় মেলা খেলপথাৰত প্ৰদৰ্শিত হৈছে। তাতে ত্ৰিপুৰাৰ মুখ্যমন্ত্ৰীয়ে এইবাৰ বেলেগ ধৰণে বাঁহ ব্যৱহাৰ কৰাৰ কথা জনাইছে। মাণিক সাহাই কয় যে তেওঁলোকে বাঁহৰ পৰা ‘গ্ৰীণ হাইড্ৰোজেন’ তৈয়াৰ কৰিব বিচাৰে। ইয়াৰ বাবে ত্ৰিপুৰাই কেন্দ্ৰৰ পৰা আৰ্থিক সাহায্য বিচাৰিব। অৱশ্যে গ্ৰীণ হাইড্ৰোজেন শক্তি উৎপাদনৰ বাবে ইতিমধ্যে কেন্দ্ৰই ১০ হাজাৰ কোটি টকা আবণ্টন দিছে।
ত্ৰিপুৰাৰ মুখ্যমন্ত্ৰীয়ে কয়, “বাঁহৰ সহায়ত এতিয়া বিভিন্ন বস্তু তৈয়াৰ কৰা হৈছে। বাঁহেৰে আমি আৰু বহু কাম কৰিব পাৰো। আমি এই ৰাজ্যৰ বাঁহ উদ্যোগৰ বিকাশৰ ওপৰত গুৰুত্ব আৰোপ কৰিছো।এখন বৈঠকো অনুষ্ঠিত কৰা হৈছে।”
তেওঁ কয়, “আমাৰ পৰিৱেশ ৰক্ষাৰ যুঁজখনো চলি আছে। আমি পৰিৱেশ অনুকূল উদ্যোগ আৰু আন্তঃগাঁথনি কেনেকৈ গঢ়ি তুলিব পাৰো সেই বিষয়েও চোৱা-চিতা কৰিছো। আমি ইয়াত সূৰ্যৰ পোহৰ আৰু জৈৱবস্তু ব্যৱহাৰ কৰি নবীকৰণযোগ্য শক্তি উৎপাদনৰ বাবে কাম কৰি আছো। লগতে ‘গ্ৰীণ হাইড্ৰোজেন’ হিচাপে বাঁহৰ পৰা নবীকৰণযোগ্য শক্তি উৎপাদন কৰিব বিচাৰো। জি-২০ বৈঠকত বিভিন্ন দেশৰ প্ৰতিনিধিয়েও আমাৰ কামৰ শলাগ লৈছে।”
ত্ৰিপুৰাত বতাহৰ পৰা শক্তি উৎপাদন সম্ভৱ নহয়। সেয়েহে ত্ৰিপুৰাত সৌৰশক্তিৰ ওপৰত গুৰুত্ব দিয়া হৈছে। ত্ৰিপুৰাৰ মুখ্যমন্ত্ৰীয়ে লগতে কয় যে গ্ৰামাঞ্চলত ১৮টা ‘মাইক্ৰোগ্ৰিড ষ্টেচন’ স্থাপন কৰা হৈছে আৰু তাত ২৭৪টা এনে ষ্টেচন স্থাপন কৰা হʼব। জৈৱিক পদাৰ্থৰ পৰা বিদ্যুৎ উৎপাদন কৰি ২৫০০ পৰিয়ালক ইয়াৰ অধীনলৈ অনাৰ পৰিকল্পনাও কৰা হৈছে।
ত্ৰিপুৰাৰ মুখ্যমন্ত্ৰীয়ে আশা কৰিছে যে এই ‘সেউজ শক্তি’ নিৰ্মাণৰ কাম চলিত বৰ্ষৰ শেষৰ পৰা বা অহা বছৰৰ আৰম্ভণিতে আৰম্ভ হʼব। ত্ৰিপুৰাৰ মুখ্যমন্ত্ৰীয়ে কয় যে জি-২০ বৈঠকত বিভিন্ন দেশৰ প্ৰতিনিধিৰ উপৰি উদ্যোগপতিসকলো উপস্থিত আছিল। দেশ আৰু বিদেশৰ সেই বিনিয়োগকাৰীসকলে ত্ৰিপুৰাত উদ্যোগ স্থাপন কৰিবলৈ আগ্ৰহী। তেওঁলোকে তাত বৈদ্যুতিক বাহন, চিকিৎসালয়, খাদ্য প্ৰক্ৰিয়াকৰণ, পৰ্যটন, ঔষধ, চাহ, বাঁহ আৰু আগৰ উদ্যোগত বিনিয়োগ কৰিব বিচাৰিছে।
