আজি বোকাখাত (Bokakhat)ত দেশৰ প্ৰথমগৰাকী নাগৰিক। দেশৰ মহামহিম ৰাষ্ট্ৰপতি দ্ৰৌপদী মুৰমু (President Draupadi Murmu) উপস্থিত হ’লহি বোকাখাতত। বায়ুসেনাৰ বিশেষ হেলিকপ্টাৰত ৰাষ্ট্ৰপতি গৰাকীয়ে যোৰহাটৰ পৰা আহি অৱতৰণ কৰে বোকাখাত ষ্টেডিয়ামৰ (Bokakhat Stadium) হেলিপেডত। ৰাষ্ট্ৰপতি গৰাকী অৱতৰণত হেলিপেডতে স্বাগতম জনায় ৰাজ্যপাল গুলাবচান্দ কাটাৰীয়া, মুখ্যমন্ত্ৰী ডঃ হিমন্ত বিশ্ব শৰ্মা, মন্ত্ৰীদ্বয় অতুল বৰা আৰু কেশৱ মহন্তই। ইয়াৰ পৰা কেইবাতৰপীয়া নিৰাপত্তা বেষ্টনীৰ মাজেৰে সন্মানীয় ৰাষ্ট্ৰপতি গৰাকীক আগবঢ়াই অনা হয়।
কিন্তু ৩৭ নং ৰাষ্ট্ৰীয় ঘাইপথ পোৱাৰ লগে লগে তেখেতক দৰ্শন কৰিবলৈ ৰৈ থকা হাজাৰ হাজাৰ লোক, ছাত্ৰ-ছাত্ৰী দেখি গাড়ী ৰখাই নিৰাপত্তা বেষ্টনীৰ পৰা ওলাই আহে ৰাষ্ট্ৰপতি। অসমৰ কণ কণ ছাত্ৰ-ছাত্ৰীৰ হাতত ধৰি গাত হাত বুলাই প্ৰায় ৪০০ মিটাৰ খোজকাঢ়ি গৈ যেন প্ৰমাণ কৰিলে, দেশপ্ৰেমিকক নালাগে নিৰাপত্তা। মহামান্য ৰাষ্ট্ৰপতিগৰাকীক নিৰ্দিষ্ট গাড়ীত উঠি কাজিৰঙা লৈ যায়। বোকাখাতৰ বিভিন্ন স্থানত গায়ন বায়নকে ধৰি বিভিন্ন থলুৱা সংস্কৃতি প্ৰদৰ্শন কৰে।
বোকাখাতৰ পৰা ৰাষ্ট্ৰীয় ঘাইপথেৰে ৰাষ্ট্ৰপতি গৰাকীক কাজিৰঙালৈ নিয়া হয়। কাজিৰঙাত ৰাষ্ট্ৰপতি গৰাকীক ঝমুইৰ নৃত্যৰে উষ্ম আদৰণী জনোৱা হয়। মহামান্য ৰাষ্ট্ৰপতিয়ে কাজিৰঙাত প্ৰায় ৪৫ মিনিট সময় জীপ চাফাৰি কৰি কাজিৰঙাৰ বিনন্দীয়া প্ৰকৃতি উপভোগ কৰে। অসমৰ ৰাজ্যপাল, মুখ্যমন্ত্ৰী, দুয়োগৰাকী মন্ত্ৰীয়ে কাজিৰঙাত ৰাষ্ট্ৰপতি গৰাকীক সংগ দিয়ে।
