শচীন (Sachin)ৰ অৰ্ধশতৰাণ। পিছে বাইশ গজত নহয়, এইবাৰ জীৱনৰ কেনভাছত। মাষ্টাৰ ব্লাষ্টাৰৰ (Master Blaster) বয়স হʼল ৫০ বছৰ (50 Years)। জন্মদিনৰ আগৰ এটা অনুষ্ঠানলৈ আহি শচীনে কয়, “বয়স আচলতে মাত্ৰ এটা সংখ্যা। জীৱনৰ বেটিঙত পঞ্চাশ কৰা মানে আৰু এটা অৰ্ধশতক। ইয়াতকৈ বেছি একো নাই।” শচীনে বিশেষ একো নক’লেও, পৃথিৱীৰ শ্ৰেষ্ঠ বেটছমেনৰ জন্মদিন, সেয়াও পঞ্চাশ বছৰ, অনুৰাগীসকল বহি থাকিব পাৰিবনে?
মুম্বাই ইণ্ডিয়ানছৰ পঞ্জাবৰ বিৰুদ্ধে খেলৰ পূৰ্বে মাষ্টাৰ ব্লাষ্টাৰৰ জন্মদিন (Master Blaster’s Birthday) উদযাপন কৰা হয়। শচীনে কেক কাটে (Sachin cuts the cake)। ৱাংখেড়ৰ ষ্টেডিয়ামত ত্ৰিশ হাজাৰ দৰ্শকে নিজৰ আসনত শচীনৰ সান্নিধ্য পালে। গোটেই ষ্টেডিয়ামখনেই এটা সময়ত শচীনময় হৈ পৰে। সেয়া চাবলগীয়া দৃশ্য আছিল। শচীন আৰু তেওঁৰ পুত্ৰ অৰ্জুন আইপিএলত ব্যস্ত। গতিকে পত্নী অঞ্জলি আৰু কন্যা ছাৰাই বৰ্তমানৰ বাবে পৰিয়ালৰ নিশাৰ আহাৰ স্থগিত ৰাখিছে। তেনেকৈয়ে ভবা হৈছিল।
কিন্তু জন্মদিনৰ দিনা শচীনে কৰা এটা পোষ্ট দেখাৰ পিছত এনে লাগিল যে কিংবদন্তিজনে পৰিয়ালৰ সৈতে ৫০ বছৰীয়া জন্মদিনটো উপভোগ কৰি আছে। দুপৰীয়া ১২ মান বজাত শচীনে নিজৰ ফেচবুক পেজত এখন ছবি পোষ্ট কৰে। চুইমিং পুলৰ দাঁতিত বহি কাপ এটাত চুমুক দি থকা দেখা গৈছে। সন্মুখত কেইজোপামান গছ আৰু কিছুমান টাইলছৰ চাল। দূৰৈত নীলা সাগৰ। কেপচনত লিখা আছে, ‘টি টাইম : ৫০ নট আউট।’ দেখাত শচীনে কেৰালাত জন্মদিন পালন কৰিছে। যদিও তেওঁ পৰিয়ালটোৰ কোনো ছবি নিদিলে। ১০০ টা শতকৰ মালিক, অসংখ্য অৰ্ধশতকো আছে।
কিন্তু এইটোৱেই তেওঁৰ আটাইতকৈ লেহেমীয়া পঞ্চাশ, অনুভৱ কৰে শচীনে। ১৯৮৯ চনৰ ১৫ নৱেম্বৰৰ পৰা তেওঁ বিশ্ব ক্ৰিকেটত যাত্ৰা আৰম্ভ কৰে। তেওঁৰ বয়স আছিল তেতিয়া মাত্ৰ ১৬ বছৰ। ভাৰতীয় ক্ৰিকেটৰ ‘ৱাণ্ডাৰ বয়’জনে ১০ বছৰ পূৰ্বে খেল এৰিছে। শচীনে ২০১৩ চনৰ নৱেম্বৰ মাহত মুম্বাইত অন্তিম টেষ্টখন খেলিছিল। কিন্তু তথাপি এতিয়াও চকু মুদিলেই সেই ট্ৰেডমাৰ্ক ষ্ট্ৰেইট ড্ৰাইভ, ক’ভাৰ ড্ৰাইভ আপোনাৰ চকুৰ সন্মুখত ভাঁহি থাকিব। ১০০ শতকৰ মালিকৰ বয়স এতিয়া ৫০ বছৰ। কুশলে থাকক শচীন।
