তৃণমূল নেত্ৰী মমতা বেনাৰ্জীৰ (Mamta Banerjee) সৈতে আলোচনাৰ পিছত উত্তৰ প্ৰদেশৰ ৰাজধানী লক্ষ্ণৌত উপস্থিত হয় বিহাৰৰ মুখ্যমন্ত্ৰী নীতিশ কুমাৰ (Nitish Kumar)। সহযোগী আৰজেডি মুৰব্বী লালু প্ৰসাদৰ (Lalu Prasad) পুত্ৰ তথা বিহাৰৰ উপ-মুখ্যমন্ত্ৰী তেজস্বী যাদৱ (Tejaswi Yadav)। উত্তৰ প্ৰদেশৰ প্ৰাক্তন মুখ্যমন্ত্ৰী আৰু সমাজবাদী পাৰ্টিৰ মুৰব্বী অখিলেশ যাদৱৰ (Akhilesh Yadav) সৈতে আগন্তুক লোকসভা নিৰ্বাচনৰ বাবে বিৰোধী মিত্ৰজোঁটৰ বাৰ্তা সন্দৰ্ভত এক বৈঠকত মিলিত হয়।
সোমবাৰে নিশা অনুষ্ঠিত বৈঠকৰ অন্তত নীতিশে স্পষ্ট কৰি দিয়ে যে তেওঁ প্ৰধানমন্ত্ৰী পদৰ যোগ্য নহয়। তেওঁ কয়, “ক্ষমতা আৰু পদৰ প্ৰতি মোৰ কোনো লোভ নাই, দেশৰ মংগলৰ বাবে কাম কৰিবলৈ চেষ্টা কৰিম। আজি মই স্পষ্টকৈ কʼব বিচাৰিছো, মই প্ৰধানমন্ত্ৰীৰ পদৰ দাবীদাৰ নহয়।” লোকসভা নিৰ্বাচনৰ বিৰোধী জোঁটৰ ‘মুখ’ কোন হ’ব? নীতিশৰ উত্তৰ, “যিদিনা আমি এখন মঞ্চলৈ আহিম, আমি আমাৰ নেতাও বাছি ল’ম।”
উল্লেখযোগ্য যে সোমবাৰে বিয়লি নৱান্নত অনুষ্ঠিত বৈঠকৰ পাছত মমতা আৰু নীতিশ-তেজস্বীয়ে বিৰোধীৰ ঐক্য শক্তিশালী কৰাৰ আহ্বান জনায়। সংবাদ মাধ্যমৰ সন্মুখত মমতাই পোনপটীয়াকৈ নীতিশক বিৰোধীৰ সৈতে বৈঠক আহ্বান কৰিবলৈ প্ৰস্তাৱ আগবঢ়ায়। ১৯৭৭ চনত বিৰোধী মিত্ৰজোঁটৰ স্থপতি বিহাৰৰ নেতা জয়প্ৰকাশ নাৰায়ণৰ কথা উল্লেখ কৰি মমতাই কয়, “মই নীতিশজীক অনুৰোধ কৰিছো, পাটনাত বিৰোধী সভা আহ্বান কৰক।”
কাকো বিৰোধীৰ নেতা হিচাপে গ্ৰহণ কৰাত আপত্তি নাই বুলি ইংগিত দি মমতাই কয়, “আমাৰ মাজত কোনো অহং ভাব নাই। আমি সকলোৱে এক।” একে সময়তে তেওঁ বিজেপিক আক্ৰমণ কৰি কয়- “বিজেপি হিৰো হৈ গৈছে, জিৰো হৈ যাব।” নীতিশৰ সৈতে হোৱা বৈঠকৰ অন্তত অখিলেশে বিৰোধী মিত্ৰতা শক্তিশালী কৰাৰ বাবেও আহ্বান জনায়। তেওঁ কয়, “বিজেপিয়ে দেশৰ গণতান্ত্ৰিক মূল্যবোধ ধ্বংস কৰিবলৈ অহৰহ চেষ্টা চলাই আছে। নিবনুৱা সমস্যা, মুদ্ৰাস্ফীতি আৰু দৰিদ্ৰতাৰ পৰা দেশক বচাবলৈ আমি সকলোৱে ভাৰতবাসীৰ সৈতে থিয় দিছো। আমি বিচাৰো বিজেপি চৰকাৰক বিদায় দিয়ক আৰু দেশ জীয়াই থাকক।”
