কাৰবি আংলং (Karbi Anglong) আৰু পশ্চিম কাৰবি আংলং (West Karbi Anglong) জিলাৰ জনতাৰ বাবে কাইলৈৰ দিনটো হ’ব এক ঐতিহাসিক দিন৷ কাইলৈ অসমৰ মুখ্যমন্ত্ৰী ড° হিমন্ত বিশ্ব শৰ্মাই (C.M. Himanta Biswa Sarma), পৰিষদৰ মুখ্য কাৰ্যবাহী সদস্য তুলিৰাম ৰংহাং, বিত্ত মন্ত্ৰী অজন্তা নেওগ, পাৰ্বত্য এলেকা উন্নয়ন দপ্তৰৰ মন্ত্ৰী যোগেন মহনৰ উপস্থিতিত দুহেজাৰ তিনি কোটি টকা প্ৰকল্পৰ আধাৰশিলা স্হাপন (Foundation stone) কৰাৰ লগতে চাৰিটা বিধানসভা সমষ্টিৰ পকী পথ আৰু অংগনৱাৰী কেন্দ্ৰ ডিজিটেলি ডিফুৰ তাৰালাংচ’ত উদ্ধোধন কৰিব৷
আজি এক সংবাদ মেলত কাৰবি আংলং স্বায়ত্ত্বশাসিত পৰিষদৰ জ্যেষ্ঠ কাৰ্যবাহী সদস্য অমৰ ছিং তিচ’, বিধায়ক দৰছিং টেৰণ, কাৰ্যবাহী সদস্য মধুৰাম লেকথেসহ পৰিষদৰ নেতৃত্বই কয় যে কাইলৈ দিনটো এক ঐতিহাসিক দিন৷ কাইলৈ মুখ্যমন্ত্ৰী ড° হিমন্ত বিশ্ব শৰ্মাই দুহেজাৰ তিনি কোটি টকাৰ পথ নিৰ্মাণ আৰু অংগনৱাৰী কেন্দ্ৰৰ আধাৰশিলা স্হাপন কৰিব৷
বিজেপি চৰকাৰৰ দিনত প্ৰথমবাৰৰ বাবে পাহাৰত ইমান বৃহৎ বিনিয়োগ হোৱা বুলি তেওঁলোকে কয়৷ লগতে বৰ্তমান নিৰ্মাণ চলি থকা দুহেজাৰ কোটি টকীয়া আন কিছু প্ৰকল্প ডিচেম্বৰত উদ্ধোধন কৰা হ’ব বুলি কয়৷ কাইলৈৰ এই বৃহৎ প্ৰগতিৰ সভালৈ সকলো প্ৰাক্তন সাংসদ, মন্ত্ৰী, বিধায়ক, পদ্মশ্ৰী প্ৰাপক ৰংবং তেৰাং, ধনেশ্বৰ ইংতিসহ সকলোকে আমন্ত্ৰণ জনোৱা হৈছে বুলি কয়৷
