মণিপুৰৰ (Manipur) মুখ্যমন্ত্ৰী এন বীৰেন সিঙে (N Biren Singh) ৰাজ্যখনৰ হিংসাত্মক ঘটনা সন্দৰ্ভত মুকলিকৈ প্ৰকাশ কৰিছে। যোৱা বুধবাৰৰ পৰা উত্তৰ-পূৰ্বাঞ্চলৰ ৰাজ্যখনত অশান্তিৰ সৃষ্টি হৈছে। ৰাজ্যৰ এটা অংশত সান্ধ্য আইন আৰোপ কৰাৰ পৰা আৰম্ভ কৰি ইণ্টাৰনেট সেৱা বন্ধ কৰালৈকে চৰকাৰে বিভিন্ন পদক্ষেপ লʼবলগা হৈছে। এই পৰিবেশত মুখ্যমন্ত্রীয়ে প্রথমবাৰৰ বাবে ৰাজহুৱাভাৱে মুখ খুলিলে ৰাজ্যখনৰ হিংসাত্মক পৰিস্থিতিৰ বিষয়ে৷ তেওঁ ৰাইজক শান্তি বজাই ৰাখিবলৈ আহ্বান জনায়।
মণিপুৰৰ চুৰাচান্দপুৰত যোৱা বুধবাৰে হিংসাত্মক পৰিস্থিতিৰ সৃষ্টি হয়। ৰাজ্যখনৰ সৰহসংখ্যক জনসংখ্যা মেইটেই সম্প্ৰদায়ৰ। দীৰ্ঘদিন ধৰি অনুসূচিত জনজাতিৰ মৰ্যাদাৰ বাবে আন্দোলন কৰি আহিছে। এই দাবীৰ বিৰোধিতা কৰি বুধবাৰে মণিপুৰী ছাত্ৰ সংগঠন ‘অল ট্ৰাইবেল ষ্টুডেন্টছ ইউনিয়ন অব মণিপুৰ’ (All Trible Students Union Of Manipur) চমুকৈ আটছুমে এক শোভাযাত্ৰা উলিয়ায়। তাৰ পৰাই আৰম্ভ হয় সংঘাত। যিটো পিছত বৃদ্ধি পায়।
সেইদিনাৰ পৰাই মুখ্যমন্ত্রী বীৰেনে কেইবাটাও টুইটৰ জৰিয়তে ৰাজ্যৰ আইন-শৃংখলাৰ পৰিস্থিতি সন্দর্ভত বিভিন্ন নির্দেশ দিছে৷ অৱশ্যে সোমবাৰে প্ৰথমে ৰাজহুৱাভাৱে মুখ খোলে তেওঁ। তেওঁ কয়, “এই হিংসাত এতিয়ালৈকে ৬০ জন লোকে প্ৰাণ হেৰুৱাইছে। আহত হয় ২৩১জন লোক। ইয়াৰ বাহিৰেও কমেও ১৭০০ ঘৰ জ্বলি গৈছে। ৰাজ্যবাসীক শান্তি বজাই ৰাখিবলৈ আহ্বান জনাইছোঁ।”
বীৰেনে লগতে কয়, “মণিপুৰৰ বিভিন্ন প্ৰান্তত গৃহহীন আৰু সিঁচৰতি হৈ থকা সকলোকে চৰকাৰে সহায় কৰি আছে। নিৰাপদ স্থানলৈ লৈ যোৱা হৈছে। এই পৰ্যন্ত ২০ হাজাৰ লোকক নিৰাপদ আশ্ৰয়স্থললৈ প্ৰেৰণ কৰা হৈছে। আৰু ১০ হাজাৰ লোক গৃহহীন।”
এই পৰিস্থিতিৰ বাবে দোষীসকলক চিনাক্ত কৰিবলৈ উচ্চ পৰ্যায়ৰ তদন্ত কৰা হʼব বুলি সকীয়াই দিছে মুখ্যমন্ত্ৰীয়ে। কেৱল সেয়াই নহয়, পৰিস্থিতি চম্ভালিব নোৱাৰা আৰু কৰ্তব্য পালনত ব্যৰ্থ হোৱা চৰকাৰী আৰু প্ৰশাসনিক বিষয়াসকলকো কঠোৰ শাস্তি প্ৰদান কৰা হʼব বুলিও তেওঁ কয়। একে সময়তে ৰাজ্যবাসীক ভুৱা বাতৰি আৰু উৰাবাতৰি প্ৰচাৰ নকৰিবলৈ বীৰেনে আহ্বান জনায়।
মণিপুৰৰ হিংসা নিয়ন্ত্ৰণৰ ক্ষেত্ৰত গৃহমন্ত্ৰী অমিত শ্বাহৰ (Amit Shah) ভূমিকাকো মুখ্যমন্ত্ৰীয়ে শলাগ লয়। তেওঁ শ্বাহক ধন্যবাদ জনায়। বীৰেনে কয় যে হিংসাৰ প্ৰথমদিনাৰ পৰাই শ্বাহে এই পৰিস্থিতিৰ মোকাবিলাত সক্ৰিয় ভূমিকা গ্ৰহণ কৰিছে। ৰাজ্যলৈ প্ৰেৰণ কৰা হৈছে কেন্দ্ৰীয় বাহিনী। ইয়াৰ বাবে তেওঁ গৃহমন্ত্ৰীৰ ওচৰত কৃতজ্ঞতা প্ৰকাশ কৰিছে।
