অসম আৰক্ষীক তেওঁলোকৰ ফিটনেছৰ (Assam Police Fitness) ওপৰত কাম কৰিবলৈ তিনিমাহৰ সময় দিয়া হʼব, তাৰ পিছত BMI ৰেকৰ্ড কৰা হʼব।অসম আৰক্ষীয়ে অৱশেষত আৰক্ষী বাহিনীৰ পৰা মেদবহুলতা মুক্ত কৰাৰ অভিযানত আই পি এছ বিষয়াকে ধৰি ইয়াৰ সকলো কৰ্মচাৰীৰ body mass index (BMI) পেছাগতভাৱে লিপিবদ্ধ কৰিব। আৰক্ষীক তেওঁলোকৰ ফিটনেছৰ ওপৰত কাম কৰিবলৈ তিনি মাহৰ সময় দিয়া হʼব, তাৰ পিছত বিএমআই ৰেকৰ্ড কৰা হʼব।
আজি আৰক্ষী সঞ্চালক প্ৰধান জি পি সিঙে (DGP G P Singh) এই সন্দৰ্ভত টুইট কৰি কয়, “আমি আই পি এছ আৰু এ পি এছ বিষয়াকে ধৰি সকলো অসম আৰক্ষীৰ জোৱানক ১৫ আগষ্টলৈকে তিনিমাহৰ সময় দি তাৰ পিছত অহা পোন্ধৰ দিনত বি এম আই মূল্যায়ন আৰম্ভ কৰাৰ পৰিকল্পনা কৰিছো।”
মেদবহুল শ্ৰেণীত (BMI ৩০+) থকা সকলোকে ওজন হ্ৰাস কৰিবলৈ আৰু তিনিমাহৰ সময় দিয়া হʼব আৰু তাৰ পিছত স্বেচ্ছামূলক অৱসৰ আঁচনিৰ (ভিআৰএছ) প্ৰস্তাৱ দিয়া হʼব। যিসকলৰ হাইপোথাইৰয়ডিজমৰ দৰে প্ৰকৃত চিকিৎসাৰ ভিত্তি আছে তেওঁলোকক ৰেহাই দিয়া হʼব বুলি উল্লেখ কৰি সিঙে কয় যে প্ৰথমে বিএমআই লোৱা হʼব ১৬ আগষ্টত। তেওঁ নিজে এই পৰীক্ষাত অৱতীৰ্ণ হ’ব বুলিও আৰক্ষী সঞ্চালক প্ৰধানগৰাকীয়ে জনায়। উল্লেখযোগ্য যে অসম আৰক্ষীত প্ৰায় ৭০ হাজাৰ কৰ্মচাৰী আছে।
অসমৰ শীৰ্ষ আৰক্ষী বিষয়াগৰাকীয়ে যোৱা সপ্তাহত কৈছিল যে তেওঁলোকে ৬৫০ জনৰো অধিক আৰক্ষীৰ তালিকা প্ৰস্তুত কৰিছে, যিসকলৰ মদ্যপান কৰাৰ অভ্যাস আছে বা মেদবহুলৰ সমস্যা আছে। আৰু ইয়াৰ ভিতৰত যিসকলক কৰ্তব্যৰ বাবে অযোগ্য বুলি ধৰা পৰিছে তেওঁলোকক সম্পূৰ্ণ পৰ্যালোচনাৰ পিছত স্বেচ্ছামূলক অৱসৰৰ প্ৰস্তাৱ দিয়া হʼব।
৮ মেʼত জি পি সিঙে এইদৰে কয়, “আমাৰ হাতত ইতিমধ্যে প্ৰায় ৬৮০ জন ব্যক্তিৰ তালিকা আছে। অৱশ্যে যুক্তিসংগত ভিত্তি অবিহনে যাতে কোনো নাম সংযোজন নহয় তাৰ বাবে আমি বেটেলিয়ন আৰু জিলাত কমিটি গঠন কৰিছো, যাৰ নেতৃত্বত থাকিব এজন ডেপুটি কমাণ্ডেণ্ট বা এজন অতিৰিক্ত এছ পি ৰেংকৰ বিষয়া।”যিসকলৰ নাম তালিকাত আছে, কিন্তু ভিআৰএছ লʼবলৈ ইচ্ছুক নহয় তেওঁলোকক ফিল্ড ডিউটি দিয়া নহʼব বুলিও সিঙে কয়।
