প্ৰকৃতিৰ সুৰক্ষাৰ স্বাৰ্থত জন্ম লোৱা আৰু উজনি অসমত সেউজ বিপ্লৱ গঢ়ি তোলা উজনি অসমৰ অন্যতম বে-চৰকাৰী স্বেচ্ছাসেৱী সংগঠন গ্রাছ, (Grass) বোকাখাতে (Bokakhat) (গ্ৰীণ ৰিভলিউশ্যনেৰী এডমায়াৰেবল চিৰিণ চচাইটি) বিগত বৰ্ষৰ দৰে এইবছৰো ২০২৩ বৰ্ষত প্ৰদান কৰিব লগীয়া বঁটা সমূহ ঘোষণা কৰিছে। আজি বোকাখাতত অনুষ্ঠিত এক সংবাদমেলত গ্ৰাছৰ সভাপতি অংকুৰ বৰঠাকুৰ, সম্পাদক ইন্দ্ৰেশ্বৰ বৰাই ঘোষণা কৰে বঁটা সমূহ।
বিশ্ব পৰিৱেশ দিৱস (World Enviroment Day) তথা গ্ৰাছৰ প্ৰতিষ্ঠা দিৱসৰ লগত সংগতি ৰাখি অহা ৫ জুনত প্ৰদান কৰিবলগীয়া বঁটা সমূহ – ধনিল বৰঠাকুৰ সোঁৱৰণী ‘গ্ৰাছ গ্ৰীণ এৱাৰ্ড’ (Grass Green Award) আগবঢ়াইছে পৰিৱেশ কৰ্মী তথা সাংবাদিক গোলাঘাটৰ বিকাশ শৰ্মালৈ, নুমলী হাজৰিকা সোঁৱৰণী ‘গ্ৰাছ ৱমেন এৱাৰ্ড’ আগঢ়াইছে মহিলা সৱলীকৰণৰ লগত জড়িত হৈ থকা বোকাখাতৰ গীতাঞ্জলি শইকীয়াক, কমলেশ্বৰ বৰা সোঁৱৰণী ‘গ্ৰাছ ফাৰ্মাৰ এৱাৰ্ড’ লাভ কৰিছে কুৰুৱাবাহীৰ আদর্শ কৃষক পাপুমণি হাজৰিকাই আৰু স্বচ্ছ আৰু পৰিৱেশৰ বাবে থানেশ্বৰ ভূঞাৰ সোঁৱৰণী ‘গ্ৰাছ নিৰ্মল সেউজ বঁটা’ লাভ কৰিছে মহুৰামুখৰ লোকপ্ৰিয় প্রাথমিক বিদ্যালয়ে।
সংবাদমেলত বোকাখাতৰ পুৱতি সাহিত্য সভা ভৱনত অনুষ্ঠিত হ’ব লগীয়া গ্ৰাছৰ প্ৰতিষ্ঠা দিৱসৰ লগত সংগতি ৰাখি গ্ৰাছৰ বাৰ্ষিক মুখপত্ৰ ‘শ্যামলিমা’ও প্রকাশ হ’ব বুলিও জানিবলৈ দিয়ে। লগতে পৰিৱেশ সম্পৰ্কীয় চিত্রাংকন প্রতিযোগিতা (ষষ্ঠ, সপ্তম আৰু অষ্টম শ্ৰেণীৰ মাজত) আৰু পৰিবেশ সজাগতৰ ওপৰত এক শোভাযাত্রা আয়োজন কৰা হৈছে বুলি গ্ৰাছৰ সম্পাদক ইন্দ্ৰেশ্বৰ বৰাই জানিবলৈ দিছে।
সংবাদমেলত সভাপতি-সম্পাদকৰ লগতে গ্ৰাছৰ তৰফৰ পৰা প্ৰফুল্ল বৰা, শিল্পী-নাট্যকৰ্মী অমৰ কাকতি, জয়ন্ত খাউণ্ড, ফনিধৰ হাজৰিকা, প্ৰমোদ ঘোষ, সঞ্জীৱ হাজৰিকা, মণ্টু বৰা, ৰবীন মহন্ত, ড° ৰঞ্জিত বৰাৰ লগতে অসম জ্যেষ্ঠ নাগৰিক সন্মিলনৰ বোকাখাতৰ সভাপতি আনিছুৰ ৰহমান, লগতে অসম ৰাজ্যিক সাংবাদিক সংস্থাৰ সভাপতি জিতু শৰ্মা ৰাজখোৱা, বোকাখাত মহকুমা সাংবাদিক সংস্থাৰ সভাপতি বুবুল দত্ত, জ্যেষ্ঠ সাংবাদিক ভৱানন্দ কলিতা, কাজিৰঙা নিউজ নেটৱৰ্কৰ অধ্যক্ষ বদন দুৱৰা, সাংবাদিক-কবি-নাট্যকাৰ অমৰ শৰ্মা, কবি-সাংবাদিকদ্বয় মৃদুস্মিতা শৰ্মা আৰু অজন্তা তালুকদাৰ, সাংবাদিকদ্বয় ৰাজীৱ বৰা আৰু সুদীপ্ত তামুলীৰ লগতে বোকাখাতৰ একাংশ সাংবাদিক আৰু বিশিষ্ট ব্যক্তি তথা গ্ৰাছৰ শুভাকাংক্ষী উপস্থিত থাকে।
উল্লেখ্য যে ক্ৰমে বিশিষ্ট যুৱ ব্যৱসায়ী কৈলাশ পাটোৱাৰীয়ে এটা ৰন্ধন গেছ ষ্টোভ আৰু কাজিৰঙা গেচ এজেঞ্চীৰ ৰাতুল দাসে এটা ৰন্ধন গেচ চিলিণ্ডাৰ গ্ৰাছৰ কাৰ্যালয়লৈ প্ৰদান কৰে। ইয়াৰ পাছতে গ্ৰাছৰ এটি সঁজাতি দলে গ্ৰাছৰ পৰৱৰ্তী পদক্ষেপৰ পৰামৰ্শ ল’বৰ বাবে বোকাখাতৰ মহকুমাধিপতি ডাঃ নেহা যাদৱক সাক্ষাৎ কৰে।
