New Parliament Building I নতুন সংসদ ভৱন ৰাষ্ট্ৰপতিয়ে উদ্বোধন কৰক, ৰাহুল গান্ধীৰ দাবী

২৮ মেʼত নতুন সংসদ ভৱন (New Parliament Building) উদ্বোধন কৰিবলৈ ওলাইছে প্ৰধানমন্ত্ৰী নৰেন্দ্ৰ মোডীয়ে (Narendra Modi)। উল্লেখ্য, উক্ত দিনটো হৈছে বিনায়ক দামোদৰ সাৱৰকাৰৰ ১৪০ সংখ্যক জন্ম জয়ন্তী। বিৰোধীৰ মতে, উক্ত দিনটো সংসদ ভৱন উদ্বোধন কৰিবলৈ বাছি লোৱাৰ আঁৰত এফালে বিজেপিয়ে হিন্দুত্ববাদৰ ঢৌ বৃদ্ধি কৰিব বিচাৰিছে আৰু আনফালে মহাৰাষ্ট্ৰৰ জনসাধাৰণলৈ বাৰ্তা প্ৰেৰণ কৰিব বিচাৰিছে।

তেওঁলোকৰ মতে, সংসদৰ ৰক্ষক হʼল ৰাষ্ট্ৰপতি (President)। গতিকে তেওঁ নতুন সংসদ ভৱন উদ্বোধন কৰা উচিত। বিৰোধীয়ে দাবী কৰিছে যে তাৰ পৰিৱৰ্তে প্ৰধানমন্ত্ৰীয়ে নিজেই সকলো কৃতিত্ব হৰলুকি কৰাৰ উদ্যোগ লৈছে। তেওঁ নিজৰ প্ৰচাৰৰ সকলো লাইমলাইট লোৱাত ব্যস্ত। সেইবাবেই ৰাষ্ট্ৰপতিক আওকাণ কৰা হৈছে। বিৰোধীয়ে অভিযোগ কৰে যে নতুন সংসদ ভৱনক কেন্দ্ৰ কৰি ৰাষ্ট্ৰপতিক আওকাণ কৰাৰ এই ইতিহাস নতুন নহয়।

২০২০ চনৰ ১০ ডিচেম্বৰত নতুন সংসদ ভৱনৰ আধাৰশিলা স্থাপন কৰা হয়। কিন্তু উক্ত অনুষ্ঠানলৈ তদানীন্তন ৰাষ্ট্ৰপতি ৰামনাথ কোবিন্দক নিমন্ত্ৰণ কৰা হোৱা নাছিল। পৰৱৰ্তী পদক্ষেপত ২০২২ চনৰ ১১ জুলাইত ৰাষ্ট্ৰীয় প্ৰতীকৰ ব্ৰঞ্জৰ মূৰ্তি উদ্বোধন কৰাৰ সময়তো ৰাষ্ট্ৰপতিৰ নাম আমন্ত্ৰণ তালিকাত নাছিল।

বিৰোধীয়ে যুক্তি দিছে যে সংবিধানৰ ৭৯ নং অনুচ্ছেদত উল্লেখ আছে যে সংসদ ৰাষ্ট্ৰপতি, লোকসভা আৰু ৰাজ্যসভাৰে গঠিত। কংগ্ৰেছ নেতা আনন্দ শৰ্মাই কয়, “প্ৰধানমন্ত্ৰীয়ে উদ্বোধন কৰাটো সাংবিধানিক নহয়। কাৰণ ৰাষ্ট্ৰপতি সংসদৰ দুয়োটা সদনৰ মুৰব্বী। তাত প্ৰধানমন্ত্ৰী কেৱল লোকসভাৰ নেতা। সংসদৰ অধিবেশন আহ্বান কৰাৰ একমাত্ৰ ক্ষমতা ৰাষ্ট্ৰপতিৰ হাতত আছে।”

আনহাতে, আৰজেডিৰ সাংসদ মনোজ কুমাৰ ঝাই একেটা প্রশ্ন কৰে, “ৰাষ্ট্ৰপতিয়ে নতুন সংসদ ভৱন উদ্বোধন কৰা উচিত নহয় নেকি? এয়া মোৰ বক্তব্য… জয় হিন্দ।” উল্লেখ্য, ৰাহুল গান্ধীয়েও আন বিৰোধী নেতাসকলৰ পূৰ্বে একেটা প্ৰশ্ন উত্থাপন কৰে। তেওঁ টুইট কৰি কয়, “ৰাষ্ট্ৰপতিয়ে নতুন সংসদ ভৱন উদ্বোধন কৰা উচিত। প্ৰধানমন্ত্ৰীয়ে নহয়।”

ইফালে কংগ্ৰেছ নেতা কে চি বেণুগোপালে কয়, “নিজকে মহান বুলি প্ৰমাণ কৰাৰ প্ৰয়াসত প্ৰধানমন্ত্ৰীয়ে পুনৰবাৰ সংসদীয় মূল্যবোধ পাহৰি ৰাষ্ট্ৰপতিক অপমান কৰিলে। ৰাষ্ট্ৰপতি সংসদৰ ৰক্ষক আৰু সংসদ মুকলি কৰিবলৈ আটাইতকৈ যোগ্য ব্যক্তি। কিন্তু প্ৰধানমন্ত্ৰীয়ে অহংকাৰ আৰু প্ৰচাৰৰ লাইমলাইট কাঢ়ি নিয়াৰ সমান্তৰালকৈ ৰাষ্ট্ৰপতিগৰাকীক পুনৰ এটা চুকলৈ ঠেলি দিলে।”