ASSAM TIMES POST
নগাঁও : উৎকোচ বিচৰাৰ অভিযোগত অসম আৰক্ষীৰ দূৰ্নীতি নিবাৰক শাখাই আজি নগাঁও চহৰৰ ডিমৰুগুৰিত অভিযান চলাই অসম শক্তি বিতৰক কোম্পানী লিমিটেডৰ টেষ্টিং আৰু কমিচনিং শাখাৰ তেজপুৰ কাৰ্যালয়ৰ সহকাৰী প্ৰবন্ধক জীতেন ঢেকিয়াল ফুকনক আটক কৰে ৷
আজি পুৱা আৰক্ষীৰ এগৰাকী উপ আৰক্ষী অধীক্ষকৰ নেতৃত্বত গুৱাহাটীৰ পৰা অহা দহ- বাৰজনীয়া আৰক্ষীৰ এটা দলে ফুকনৰ ঘৰত অভিযান চলাই বেংক পাচবুককে ধৰি বিভিন্ন আপত্তিজনক নথি পত্ৰ জব্দ কৰে।প্ৰায় তিনি ঘন্টা জোৰা অভিযানৰ অন্তত দুৰ্ণীতি নিবাৰক শাখাৰ দলটোৱে সহকাৰী প্ৰবন্ধক ফুকনক লগত লৈ গুৱাহাটীলৈ উভতি যায়।
আৰক্ষী দলটোৱে কালি উৎকোচ লৈ থকা অৱস্থাত তেজপুৰৰ এখন ৰেষ্টুৰেন্টৰ পৰা গ্ৰেপ্তাৰ কৰা অসম শক্তি বিতৰক কোম্পানী লিমিটেডৰ তেজপুৰস্হিত কাৰ্যালয়ৰ সহ মহা প্ৰবন্ধক প্ৰকাশ ৰঞ্জন দত্তকো লগত লৈ আনিছিল।জানিব পৰা মতে তেজপুৰ ঘোৰামাড়ীৰ ডাবৰ ইন্ডিয়া লিমিটেডৰ এটা উৎপাদন প্ৰকল্পত সৌৰচালিত মিটাৰ স্হাপনৰ বাবে এক লাখ টকা প্ৰতিষ্ঠান এটাৰ পৰা উৎকোচ হিচাপে বিচাৰিছিল।পিছত আশীহেজাৰ টকাত বন্দোবস্তি হৈছিল যদিও প্ৰতিষ্ঠানটোৱে সেই ধন আদায় নিদি অসম আৰক্ষীৰ দূৰ্ণীতি নিবাৰক শাখাক অৱগত কৰে।
ইয়াৰ পিছত দুৰ্ণীতি নিবাৰক শাখাই উৎকোচ বিচৰা সমগ্ৰ ঘটনাৰ তদন্ত কৰি কালি হাতে-লোটে প্ৰকাশ ৰঞ্জন দত্তক আটক কৰাৰ পিছত আজি পুুৱা জিতেন ঢেকিয়াল ফুকনক নিজ বাসগৃহৰ পৰা আটক কৰে।
